Թուրքիայում երիտասարդը համակարգչային խաղերի ազդեցության տակ հարձակվել է մարդկանց վրա

Թուրքիայում աղմկահարույց հարձակում է տեղի ունեցել։ Թուրքիայի հյուսիս-արևմուտքում սաղավարտով և զրահաբաճկոնով երիտասարդը դանակով հարվածել է հինգ մարդու բացօթյա սրճարանում։

Թուրքական ԶԼՄ-ի տեղեկացմամբ՝ երիտասարդը հարձակումը իրականացնելու պահը լուսանկարել է, որպեսզի այնուհետև տարածի այն համացանցում։

Հարձակման արդյունքում տուժել է 5 մարդ, որոնցից 2-ի վիճակը ծայրահեղ ծանր է։

Հարձակվողի ձեռքին նաև եղել է կացին, որը ըստ երեւույթին, չի օգտագործվել։ Թուրքիայի ներքին գործերի նախարար Ալի Երլիքայան հայտնել է, որ սկսվել է հետաքննություն։

Թուրքական HaberTurk-ը տեղեկացրել է, որ երիտասարդը հարձակումը իրականացրել է համակարգչային խաղերի ազդեցության տակ։