Իրանի նախագահ Մասուդ Փեզեշքիանն Ադրբեջանի փոխվարչապետ Շահին Մուստաֆաևի հետ հանդիպման ժամանակ հայտարարել է, որ որևէ երկրի ինքնիշխանության իրավունքը չպետք է անտեսվի:
Հանդիպման ժամանակ Իրանի նախագահը հավելել է, որ պաշտոնական Թեհրանը տարածաշրջանի երկրների օգտին չի համարում օտար ուժերի համար տեղ բացելը:
«Հարևան մյուս երկրների և տարածաշրջանի իսլամական երկրների պաշտոնյաների հետ հանդիպման ժամանակ ես ընդգծել եմ, որ մենք պետք է հնարավորություն ստեղծենք հեշտացնելու մարդկանց միջև հաղորդակցությունն ու շփումը։ Այս առումով մենք ողջունում ենք բոլոր այն նախագծերը, որոնք էլ ավելի են զարգացնում իսլամական երկրների միջև կապերը»,- ասել է Իրանի նախագահը:
Փեզեշքիանը ողջունել է նաև երկու երկրների միջև երկաթուղային և ավտոմայրուղային երթուղիների ստեղծումը, ինչպես նաև պատրաստակամություն հայտնել շարունակել և ընդլայնել համագործակցությունը էներգետիկայի և գյուղատնտեսության ոլորտներում:
Նրա խոսքով՝ Թեհրանը հետամուտ է Ադրբեջանի դեսպանատան վրա հարձակման գործին:
Ադրբեջանի փոխվարչապետն իր հերթին ընդգծել է, որ Բաքուն կարևորում է Իրանի հետ հարաբերությունների զարգացումը և պատրաստ է խորացնել բազմակողմ համագործակցությունը, այդ թվում՝ տնտեսության, առևտրի, էներգետիկայի, մշակույթի, երկաթուղային ու ցամաքային ճանապարհների, պաշտպանության, անվտանգության ոլորտներում:
«Մենք որևէ երկրի նկատմամբ տարածքային պահանջ չունենք և փոխադարձաբար մեր տարածքների նկատմամբ որևէ երկրի պահանջ չենք ընդունում: Վստահ ենք՝ տարածաշրջանի խնդիրները պետք է լուծվեն տարածաշրջանի երկրների միջև բանակցություններով»,- ասել է Մուստաֆաևը:
Ադրբեջանի փոխվարչապետն Իրանի նախագահին հրավիրել է մասնակցել COP29-ին:
Հետևեք մեզ տելեգրամում
