ԱՄՆ կոնգրեսական Ֆրենկ Փալոնը, որը Բաքվում մասնակցում էր ՄԱԿ-ի կլիմայի փոփոխության COP-29 գագաթնաժողովին, հայտնել է, որ Ադրբեջանի կառավարությունը հովանավորել է իր դեմ բողոքի ցույցերը և՛ COP 29-ում, և՛ հյուրանոցում, որտեղ նա մնացել էր: Նա խուսափել է ֆիզիկական վնասից միայն Պետդեպարտամենտի ջանքերով։
Ֆրենկ Փալոնի պաշտոնական կայքը տեղեկացնում է, որ Ադրբեջանի նախագահ Իլհամ Ալիևը Փալոնին բացառել էր Կոնգրեսի անդամների հետ երկկողմ հանդիպումից։ Փալոնը հանդիպում էր խնդրել Բաքու մեկնող Ներկայացուցիչների պալատի պատվիրակության անունից, սակայն նրան հատուկ հեռացրել են կազմից։ Արդյունքում, Փալոնը Ներկայացուցիչների պալատի անդամներին, որոնց թույլատրվել էր հանդիպել Ալիևի հետ, խնդրել է բարձրաձայնել Հայաստանի նկատմամբ ադրբեջանական ագրեսիայի շարունակականության հարցը:
«Վրդովեցուցիչ է և շատ խոսուն, որ նախագահ Ալիևը փորձում է լռեցնել ԱՄՆ Կոնգրեսի անդամներին և կանխել հայ ժողովրդի համար մարդու իրավունքների և արդարության վերաբերյալ քննադատական քննարկումները, նույնիսկ փակ դռների հետևում։ Ինձ լռեցնելու ջանքերը միայն ամրապնդում են իմ վճռականությունը՝ պայքարելու հաշվետվողականության, բարեփոխումների և նրանց արժանապատվության համար, ովքեր տուժել են Ադրբեջանի ճնշող ռեժիմի ներքո։ Ես կշարունակեմ պայքարել Բաքվում պահվող հայ գերիների ազատ արձակման, Հայաստանի տարածքային ինքնիշխանության պաշտպանության և հայկական հողից ադրբեջանական զորքերի հեռացման ու խաղաղության պայմանագրի համար, որը հանգստություն կբերի տարածաշրջանին»,-հավելել է Փալոնը:
Կայքը նշում է, որ Ֆրենկ Փալոնը մշտապես հանդես է եկել տարածաշրջանային խաղաղության հաստատման օգտին և դատապարտել է Ադրբեջանի ռազմական հարձակումը ու Լեռնային Ղարաբաղում հայերի էթնիկ զտումները:
Հետևեք մեզ տելեգրամում
