75 տարեկանում կյանքից հեռացել է պոլսահայ ականավոր գործիչ, Ստամբուլի հայկական «Արաս» հրատարակչության հիմնադիրներից Եթվարթ Թոմասյանը (Թոմո):
Թոմասյանի մահվան մասին լուրը տարածել է Արաս Հրատարակչությունը։ Հրատարակչության տարածած հայտարարության մեջ մասնավորապես ասվում է.
«Մեզանից հեռացել է մեր հրատարակչության համահիմնադիր, մեր ուսուցիչ, մշտապես մեր աջակից Եթվարթ Թոմասյանը՝ մեր սիրելի Թոմոն: Թոմոն իր կյանքը նվիրել էր հայ համայնքին, մշակույթին ու գրականությանը: «Արասի» հիմնադրմամբ տնկված մեծ «ծառը» նրա ջանքերով արմատավորվեց և բազմաթիվ պտուղներ տվեց: Թոմոյի քաջությունը, համեստությունը և անկեղծությունը միշտ մեզ համար ուղեցույց են եղել: Հրատարակչության էջերում, յուրաքանչյուր գրքում նրա հետքերն էին: Նրա մասին հիշում ենք սիրով, հարգանքով և երախտագիտությամբ: Թո՛մո Աբի, թող քո ձեռքը միշտ մեր մեջքին լինի»:
Եթվարթ Թոմասյանի հոգեհանգստի արարողությունը տեղի կունենա դեկտեմբերի 17-ին, երեքշաբթի օրը, ժամը 14:00-ին Ստամբուլի Քումքափըի Մարիամ Աստվածածին եկեղեցում։
1993թ.-ին Եթվարթ Թոմասյանի, Հրանտ Դինքի, Արտաշես Մարգոսյանի և Մկրտիչ Մարգոսյանի կողմից հիմնադրվել է «Արաս» հրատարակչությունը՝ հայ համայնքի և նրա էության, պատմության և անցյալի ներկայացման նպատակով: Հրատարակչությունը հիմնականում ներկայացնում է հայ հեղինակների թուրքերեն թարգմանված գործերը, Թուրքիայում ապրող հայ գրողների թուրքերեն գրքերը և հայերին վերաբերվող մշակութային ու պատմական աշխատությունները, հրատարակում է նաև հայերեն գրքեր։ Հիմնադրման օրվանից ավելի քան 170 գիրք է հրատարակել:
Հետևեք մեզ տելեգրամում
