Սիրիայի անցումային կառավարության արտաքին գործերի նախարար Ասադ Հասան Ալ-Շիբանին Դամասկոսում ընդունել է Ադրբեջանի փոխարտգործնախարար Յալչին Ռաֆիևի գլխավորած պատվիրակությանը։
Ըստ ադրբեջանական լրատվամիջոցների՝ Ադրբեջանի փոխարտգործնախարարը նշել է, որ Ադրբեջանը Սիրիայի նոր վարչակազմին անհրաժեշտ աջակցություն կցուցաբերի դիվանագիտական հիմունքներով, ինչպես նաև մարդասիրական օգնության տեսքով, իսկ «օկուպացիայից ազատագրված ադրբեջանական տարածքների» վերականգնման և վերակառուցման ոլորտում փորձը կարող է կիրառվել Սիրիայում։
Սիրիայի ԱԳ նախարար Ասադ Հասան ալ-Շիբանին Ադրբեջանի կողմից Արցախի բռնազավթումն անվանել է «կարևոր իրադարձություն՝ տարածաշրջանում և ամբողջ աշխարհում խաղաղության հաստատման համար»։
Զրուցակիցները պայմանավորվել են նաև զարգացնել համագործակցությունը երկու երկրների միջև և նոր էջ բացել հարաբերություններում։ Ակնկալվում է, որ մոտ ապագայում Դամասկոսում Ադրբեջանի դեսպանատունը կվերսկսի իր աշխատանքը, իսկ Սիրիայի ԱԳ նախարարն ընդունել է Ադրբեջան այցելելու հրավերը։
Հետևեք մեզ տելեգրամում
