Թուրքիան Սիրիային օգնելու համակարգման մեխանիզմ է ստեղծել․ Ֆիդան

Թուրքիայի իշխանությունները ստեղծել են Սիրիային օգնություն ցուցաբերելու համակարգման մեխանիզմ։ Այս մասին հայտարարել է Թուրքիայի արտաքին գործերի նախարարության ղեկավար Հաքան Ֆիդանը` հույս հայտնելով, որ Եվրամիությունը մոտ օրերս կհանի Դամասկոսի նկատմամբ սահմանված պատժամիջոցների մի մասը։

«Մենք հուսով ենք, որ ԱՄՆ-ի կողմից Սիրիայի դեմ պատժամիջոցների մասնակի վերացումից հետո Եվրամիությունը նույնպես առաջիկա օրերին կհանի մի շարք սահմանափակումներ: Թուրքիան ստեղծել է համակարգող մեխանիզմ՝ Սիրիային օպերատիվ օգնություն ցուցաբերելու այնպիսի ոլորտներում, ինչպիսիք են տրանսպորտը, էներգետիկան: Սիրիացիները մեր եղբայրներն են, և, իհարկե, մեզ համար կենսականորեն կարևոր է, որ Սիրիան լինի կայուն և զարգանա տնտեսապես»,-Haber հեռուստաալիքը մեջբերում է նախարարի խոսքերը։

Ֆիդանը նաև հանդես է եկել Սիրիայում ներառական կառավարություն ձևավորելու, նրա տարածքային ամբողջականության և ինքնիշխանության պահպանման, ինչպես նաև բոլոր զինված կազմավորումները, որոնցից ամենամեծ թիվը գործում է երկրի հյուսիսում, մեկ հարկի տակ միավորելու օգտին։