Իրանի արտգործնախարար Աբաս Արաղչին հայտարարել է, որ ԱՄՆ-ի կողմից Իսլամաբադի փոխըմբռնման հուշագրով ստանձնած պարտավորություններին վերադառնալը կարող է նպաստել տարածաշրջանում բնականոն իրավիճակի վերականգնմանը։ Այս մասին նա ասել է Ճապոնիայի արտգործնախարար Տոշիմիցու Մոտեգիի հետ հեռախոսազրույցի ընթացքում, հայտնում է «Tasnim»-ը։
Արաղչիի խոսքով՝ տարածաշրջանում ստեղծված լարվածությունը պայմանավորված է ԱՄՆ-ի կողմից հուշագրով ստանձնած պարտավորությունները խախտելու հանգամանքով։ Ըստ նրա՝ իրավիճակի լուծումը պարզ է՝ ԱՄՆ-ը պետք է վերադառնա իր պարտավորությունների կատարմանը և պահպանի հուշագրով ստանձնած պայմանավորվածությունները։
Իրանի արտգործնախարարը նաև անդրադարձել է Օմանի հետ Հորմուզի նեղուցի շուրջ բանակցություններին։ Նա հայտնել է, որ կողմերը զգալի առաջընթաց են գրանցել նեղուցով ժամանակավոր տարանցիկ երթուղու սահմանման հարցում և շարունակում են քննարկումները դրա հետագա կառավարման մեխանիզմների շուրջ։
Ճապոնիայի արտգործնախարարն իր հերթին մտահոգություն է հայտնել տարածաշրջանում լարվածության աճի կապակցությամբ։ Նա ընդգծել է դիվանագիտական խորհրդակցությունների շարունակման անհրաժեշտությունը՝ տարածաշրջանում անվտանգությունն ապահովելու և Հորմուզի նեղուցով ազատ ու անվտանգ նավարկությունն ապահովելու համար։
Հետևեք մեզ տելեգրամում
