Փարիզի Էյֆելյան աշտարակը աշխատակիցների մեկօրյա գործադուլից հետո սեպտեմբերի 8-ին վերաբացվել է։ Գործադուլը կապված էր սեպտեմբերի 5-ին տեղի ունեցած միջադեպի հետ, երբ հինդուական կրոնական կազմակերպության պատվիրակության այցի ընթացքում կին աշխատակիցներին խնդրել էին հեռանալ իրենց աշխատանքային վայրերից։ Այս մասին հայտնում է «BBC»-ն։
Մոտ 100 հոգուց բաղկացած պատվիրակությունը կապված է «BAPS» հինդուական կազմակերպության հետ և սեպտեմբերի 5-ին այցելել է Էյֆելյան աշտարակ։ Աշխատակիցների ներկայացուցիչ Դիան Դավուանի խոսքով՝ պատվիրակության ժամանելուց հետո կանանց խնդրել են հեռանալ, իսկ որոշ աշխատատեղերում նրանց փոխարինել են տղամարդիկ։ Աշխատակիցները դժգոհել են, որ նման վերաբերմունքն անընդունելի է։
Էյֆելյան աշտարակի շահագործմամբ զբաղվող «SETE» ընկերությունը հաստատել է, որ պատվիրակությունը խնդրել էր այցը կազմակերպել այնպես, որ սահմանափակվեն կանանց հետ շփումները։ Ընկերությունը հայտարարել է, որ նման պայմանները չպետք է ընդունվեին, քանի որ դրանք չեն համապատասխանում կանանց և տղամարդկանց հավասարության սկզբունքին։ Փարիզի քաղաքապետ Էմանուել Գրեգուարը հայտարարել է, որ դեպքի հանգամանքները պետք է հետաքննվեն։
«BAPS»-ը ներողություն է խնդրել տեղի ունեցածի համար՝ նշելով, որ, իր տեղեկություններով, որևէ մեկի մուտքը Էյֆելյան աշտարակ չի սահմանափակվել։ Կազմակերպությունը հայտնել է, որ այցը նախապես համաձայնեցվել էր աշտարակի ղեկավարության հետ և կազմակերպվել էր առավոտյան՝ մյուս այցելուներին չխանգարելու նպատակով։
Հետևեք մեզ տելեգրամում
