«Միայն Հայաստանն ու Իրանն են, որ «Զանգեզուրի միջանցքի» հարցում միատեսակ մոտեցում ունեն։ Միայն Իրանն է, որ աջակցում է ՀՀ-ին՝ դեմ հանդես գալով «Զանգեզուրի միջանցքին»: Այս մասին հայտարարել է ՀՀ-ում Իրանի դեսպան Մեհդի Սոբհանին փետրվարի 6-ին կահացած ասուլիսին:
Լրագրողի հարցին, թե, այսպես կոչված, «Զանգեզուրի միջանցքը» բացելու համար Ադրբեջանի հնարավոր հարձակման դեպքում ի՞նչ քայլեր կձեռնարկի Իրանը, դեսպանը հարցով պատասխանել է. «Դուք ի՞նչ եք ուզում, որ Իրանն ի՞նչ անի։ Ի՞նչ եք ակնկալում, որ Իրանն անի»։
Դեսպանը հավելել է, որ Իրանը կողմնակից է հարցերը լուծել դիվանագիտական ճանապարհով և երկխոսության միջոցով։
«Մենք դեմ ենք ուժի կիրառման միջոցով տարածաշրջանային խնդիրները լուծելուն։ Մենք մեր բոլոր ջանքերը կգործադրենք, որ տարածաշրջանը չմտնի նոր լարված վիճակի մեջ։ Նոր ճանապարհ ստեղծելու համար ուժի կիրառումը որևէ բացատրություն չունի։ Ես չեմ ցանկանում հիմա խոսել, թե ինչ կարող է ապագայում տեղի ունենալ, և դրա վերաբերյալ դիրքորոշում հայտնել։ Ճանապարհի ստեղծումն ուժի կիրառման միջոցով որևէ բացատրություն չունի։ Եթե մենք ուղղորդվենք այս տրամաբանությամբ, ուրեմն նոր հակամարտություն չպետք է տեղի ունենա։ Մենք մեր բոլոր ջանքերը կգործադրենք, որպեսզի նոր հակամարտություն չլինի»,- ասել է Սոբհանին:
Իրանի դեսպանը նաև հորդորել է չթերագնահատել Հայաստանի կարողությունները։
«Եթե հիմա հարձակում լինի, ես կարծում եմ՝ Հայաստանն ունի համապատասխան պաշտպանական հնարավորություն, որ պաշտպանի իր սահմանները։ Ձեր երկրի պաշտպանական կարողությունները մի թերագնահատեք»,- ասել է նա:
Հետևեք մեզ տելեգրամում
