Վրաստանի կառավարությունը որոշում է կայացրել ապրիլի 15-ի ժամը 21:00-ից բոլոր տիպի տրանսպորտային միջոցների համար 10 օրով փակել հանրապետության չորս մեծ քաղաքների՝ Թբիլիսիի, Ռուսթավիի, Բաթումիի և Քութաիսիի մուտք ու ելքերը։ Այս մասին հայտարարել է Վրաստանի վարչապետ Գիորգի Գախարիան:
Ինչպես նշել է Գիորգի Գախարիան, դա նշանակում է, որ կառավարությունն անում է առավելագույնը, որպեսզի խոշոր քաղաքներում նվազեցվի տեղաշարժման չափաբաժինը:
Նրա խոսքով՝ ապրիլի 14-ին առաջին դեպքն է, երբ մեկ օրում Վրաստանում վարակվել է 30 մարդ:
«Այսօրվա դրությամբ թեստավորում է անցել 500 մարդ, կարող ենք ասել, որ երկրում արդեն մեկնարկել է լայնամասշտաբ տարածումը: Ճշգրիտ ոչ ոք չի ասում, երբ կլինի ճգնաժամի տարածման գագաթնակետը», – հայտարարել է Գիորգի Գախարիան:
Վրաստանի վարչապետը նաև հայտարարել է, որ երկրում կորոնավիրուսի տարածումը կանխելու նպատակով սահմանված արտակարգ դրության ռեժիմի ժամկետը երկարաձգվում է մինչև մայիսի 10-ը:
Հետևեք մեզ տելեգրամում
