Արաբական առաջնորդները մտադիր են դիմել ՄԱԿ-ի Անվտանգության խորհրդին՝ Գազայի հատվածում և Հորդանան գետի արևմտյան ափում միջազգային խաղաղապահ զորախումբ ուղարկելու համար։ Համապատասխան դրույթը ընդգրկվել է Արաբական պետությունների լիգայի (ԱՊԼ) գագաթնաժողովի եզրափակիչ հայտարարության նախագծում:
«Արաբական գագաթաժողովի եզրափակիչ հայտարարության նախագիծը կոչ է անում ՄԱԿ-ի Անվտանգության խորհրդին միջազգային խաղաղապահ ուժեր տեղակայել Հորդանան գետի Արևմտյան ափում և Գազայի հատվածում՝ ապահովելու Պաղեստինի և Իսրայելի ժողովուրդների անվտանգությունը»,-հայտնել է Sky News Arabia հեռուստաալիքը:
Գագաթաժողովի մասնակիցները մտադիր են նաև աջակցել Գազայի հատվածի վերականգնման վերաբերյալ Եգիպտոսի իշխանությունների պատրաստած ծրագրին։ Վերակառուցման ծրագիրը նախատեսում է անկլավում ստեղծել հատուկ հումանիտար գոտիներ, որտեղ պաղեստինցիները կկարողանան բնակություն հաստատել մինչև իսրայելական ռմբակոծությունների հետևանքով ավերված իրենց տները վերակառուցվեն։ Եթե բոլոր արաբական երկրների հավանություն տան այս ծրագրին, ապա այն կներկայացվի միջազգային հանրությանը։ Ծրագրի արժեքը գնահատվում է 53 մլրդ դոլար։
Արաբական լիգայի արտահերթ գագաթաժողովը կայանալու է այսօր՝ մարտի 4-ին, Կահիրեում։ Այն գումարվել է Պաղեստինի խնդրանքով ԱՄՆ նախագահ Դոնալդ Թրամփի վերջին հայտարարություններից հետո, որով Վաշինգտոնը դիտարկում է Գազայի հատվածի երկարաժամկետ սեփականության իրավունքը և նրա բնակիչներին տարածաշրջանի այլ երկրներ վերաբնակեցնելու հարցը:
Հետևեք մեզ տելեգրամում
