«ՀԱՄԱՍ»-ը հաստատել է, որ Գազայի վերաբերյալ առաջարկ է ստացել

Պաղեստինյան «ՀԱՄԱՍ» շարժումը հաստատել է, որ միջնորդներից Գազայի հատվածի հրադադարի վերաբերյալ առաջարկ է ստացել և ներկայումս ուսումնասիրում է փաստաթուղթը։ Համապատասխան հայտարարությունը հրապարակվել է շարժման Telegram ալիքում։

«ՀԱՄԱՍ»-ի ղեկավարությունն ուսումնասիրում է միջնորդների ներկայացրած առաջարկը և մոտ ապագայում՝ բոլոր անհրաժեշտ խորհրդակցությունների ավարտից հետո, դրա պատասխանը կտրամադրի»,- ասվում է հաղորդագրության մեջ։

Շարժումը հավելել է, որ շարունակում է պնդել, որ պետք է հաստատել «մշտական ​​հրադադար, իսրայելական զորքերը պետք է ամբողջապես դուրս գան Գազայի հատվածից, կատարվի իսրայելցի պատանդների՝ պաղեստինցի գերիների հետ փոխանակման մասին համաձայնագիրը, վերականգնվի անկլավը և վերացվի շուրջափակումը»։

Երկուշաբթի եգիպտական ​​Al-Qahira al-Ikhbariya հեռուստաալիքը, հղում անելով աղբյուրներին, հայտնել է, որ Իսրայելը Եգիպտոսի միջոցով «ՀԱՄԱՍ»-ին է փոխանցել Գազայի հատվածում կրակը ժամանակավորապես դադարեցնելու և կայուն զինադադարի հասնելու շուրջ բանակցություններ սկսելու առաջարկը։ Իր հերթին Al Hadath հեռուստաալիքը հայտնել է, որ իսրայելական կողմի առաջ քաշած պայմաններից մեկը «ՀԱՄԱՍ»-ի զինաթափումն է։