Սիրիայում Թուրքիայի ազդեցությունն անհանգստացնում է Իսրայելին

Սիրիայում պատերազմի ավարտից հետո Դամասկոսի և Անկարայի միջև համագործակցությունը կրկին հայտնվել է օրակարգում՝ Քաթարի բնական գազի տեղափոխման նախագծի շրջանակում, որն ընդգրկում է Սիրիա-Թուրքիա միջանցքը դեպի եվրոպական շուկաներ։ Այս մասին գրում է CNNTURK (https://www.cnnturk.com/video/dunya/israilin-suriyede-turkiye-endisesi-2270459) լրատվամիջոցը՝ հղում կատարելով իսրայելական լրատվամիջոցներին։

Ըստ այդմ՝ երկրի իշխանությունները մտահոգություն են հայտնում այս նախագծի հնարավոր ազդեցության կապակցությամբ՝ պայմանավորված այն հանգամանքով, որ գազի և նավթի տարանցման ուղին անցնում է Սիրիայի և Թուրքիայի տարածքով։

Իսրայելական Yediot Ahronot թերթը հրապարակել է վերլուծություն՝ ընդգծելով, որ Թուրքիան միանշանակ չի պատրաստվում թողնել Սիրիայի տարածքն Իսրայելի ձեռքում։ Հոդվածում քննադատվել է Իսրայելի ռազմավարության բացակայությունը Սիրիայի հարցում, և նշվում է, որ Թուրքիան առանցքային դեր է խաղում Սիրիայի կայունության հարցում։ Իր հերթին, Իսրայելի նախկին դեսպան Ամիրա Օրոնը խորհուրդ է տվել Իսրայելին՝ խուսափել ռազմական բախումներից՝ դիվանագիտական հարաբերությունները խորացնելով Անկարայի հետ։

Չնայած Իսրայելի կողմից Սիրիայի տարածքում օդային հարձակումների ու ցամաքային օկուպացիայի ընդլայնման, ինչպես նաև դրուզների ու Սիրիայի դեմոկրատական ուժերի հետ կապ հաստատելու ջանքերին, Իսրայելը դեռևս չի կարողացել ձևավորել հստակ քաղաքականություն Սիրիայի հարցում։

Նշենք, որ իսրայելական գնահատականներով՝ Անկարան Սիրիայում միայն ռազմական ներկայությամբ չի սահմանափակվում, այլ նաև մասնակցում է երկրի ապագա կարգավորման գործընթացին։ Սա Թուրքիայի համար ստեղծում է նոր ազդեցության կենտրոն, որը մրցում է Իսրայելի շահերի հետ՝ հատկապես անվտանգության և էներգետիկ հարցերում։