Թբիլիսիում մեկնարկել է Վրաստանի, Հայաստանի և Ադրբեջանի փոխարտագործնախարարների հանդիպումը։ Վրաստանի արտաքին գործերի նախարարության տեղեկացմամբ՝ հանդիպման նախաձեռնողներն են Վրաստանի արտգործնախարար Մակա Բոճորիշվիլին, ՀՀ արտգործնախարար Արարատ Միրզոյանը և Ադրբեջանի արտգործնախարար Ջեյհուն Բայրամովը։
Հանդիպումը բացել է Վրաստանի արտգործնախարարը, այնուհետև այն շարունակվում է փակ ձևաչափով՝ նախարարների տեղակալների մակարդակով։
«Հանդիպմանը նախագահում են Վրաստանի արտգործնախարարի տեղակալ Լաշա Դարսալիան, Ադրբեջանի արտգործնախարարի տեղակալ Էլնուր Մամեդովը և Հայաստանի արտգործնախարարի տեղակալ Վահան Կոստանյանը։ Հանդիպման հիմնական նպատակն է՝ կիսվել երեք երկրների տեսլականով և դիտարկումներով այն հնարավոր ուղղությունների վերաբերյալ, որոնք կարող են հիմք դառնալ եռակողմ համագործակցության գործընթացի համար։ Այս հանդիպումը նպատակ ունի քննարկել ընդհանուր շահերը, ինչը հետագայում կաջակցի երկրների միջև փոխշահավետ և գործնական եռակողմ համագործակցության զարգացմանը, որն էլ ի վերջո ուղղված կլինի տարածաշրջանի բարօրությանը, կայունությանն ու կայուն զարգացմանը։ Այսօրվա եռակողմ հանդիպումը ոչ միայն չի հակասում արդեն գոյություն ունեցող որևէ համագործակցության ձևաչափի, այլ նաև երեք հարևան երկրների լրացուցիչ ջանք է՝ կառուցողական և փոխշահավետ համագործակցություն ձևավորելու ուղղությամբ»,-հայտնել են Վրաստանի արտգործնախարարությունից։
Հետևեք մեզ տելեգրամում
