Իրանում աստիճանաբար սկսել են չեղարկել կորոնավիրուսի համավարակի պատճառով կիրառվող սահմանափակումները։ Այսպես, ապրիլի 20-ից թույլատրվել է երթևեկությունը միջքաղաքային ավտոմայրուղիներով։ Մեկուսացման խիստ ռեժիմը մեղմացվել է, թույլատրվել է գործունեության որոշ տեսակների վերսկսումը։ Բացվել են բոլոր առևտրի կենտրոնները, սակայն դրանք կաշխատեն միայն մինչև ժամը 18։00։
Իրանում կորոնավիրուսի դեն պայքարի շտաբի ղեկավար Ալիռեզա Զալին զգուշացրել է, որ գործունեության որոշ տեսակների վերսկսումը կորոնավիրուսի տարածման նոր ալիք կարող է առաջացնել։
Միևնույն ժամանակ հայտնի է դարձել, որ առայժմ չեն բացվի ռեստորանները, մարզասրահները, այլ հասարակական հաստատությունները։ Փակ կմնան նաև աղոթատեղիները՝ չնայած, որ սկսվում է մահմեդականների համար սուրբ ռամադան ամիսը։
Ավելի վաղ Իրանի նախագահ Հասան Ռուհանին հայտարարել էր, որ մզկիթները կարող են բացվել մայիսի 4-ին։ Սակայն Իրանի գերագույն հոգևոր առաջնորդ այաթոլա Ալի Խամենեին իր հերթին նշել է, որ մասսայական հավաքները կարող են արգելվել մինչև ռամադանի ավարտը։
Նշենք, որ ապրիլի 20-ի դրությամբ Իրանում արձանագրվել է կորոնավիրուսով վարակվածության 82․211 դեպք։ 5․118 հիվանդ մահացել է, առողջացել է 57․023-ը։ Ապրիլին Իրանի իշխանությունները հայտարարեցին, որ երկրում կորոնավիրուսով վարակվածության նոր դեպքերի թիվն աստիճանաբար նվազում է։
Հետևեք մեզ տելեգրամում
