Ադրբեջանում հատուկ կարանտինային ռեժիմը երկարաձգվել է մինչև մայիսի 4-ը։ Այս մասին այս շաբաթ հայտարարել է Ադրբեջանի կառավարությանը կից գործող օպերատիվ շտաբը։ Մինչև մայիսի 4-ը կշարունակեն փակ մնալ նաև բոլոր ուսումնական հաստատությունները, ինչպես նաև՝ Ադրբեջանի և Վրաստանի ու Իրանի միջև սահմանային անցակետերը։
Ադրբեջանում մարտի 14-ից ներդրվել էր սոցիալական մեկուսացման ռեժիմ, իսկ մարտի 24-ից մինչև ապրիլի 20-ը՝ հատուկ կարանտինային ռեժիմ։ 65 տարեկանից բարձր տարիքային խմբի անձանց արգելվել է դուրս գալ իրենց տներից։ Արգելված է նաև մայրաքաղաք Բաքվի, Սումգայիթ և Ապշերոն շրջանների ելումուտը, դադարեցված է տրանսպորտային հաղորդակցությունը երկրի բոլոր շրջանների ու քաղաքների միջև։
Ադրբեջանում փողոց դուրս գալը թույլատրվում է միայն մի քանի դեպքում․ անհետաձգելի բժշկական օգնություն ստանալու նպատակով, սննդամթերքի և առաջին անհրաժեշտության այլ ապրանքների, դեղամիջոցների ձեռքբերման նպատակով, բանկային կամ փոստային ծառայություններից օգտվելու նպատակով, մոտ ազգականների հուղարկավորությանը մասնակցելու նպատակով։
Սակայն տանից դուրս գալուց առաջ քաղաքացիները պետք է անվճար հաղորդագրություն ուղարկեն 8103 կարճ համարին՝ համապատասխան թույլտվություն ստանալու համար։ Հաղորդագրությունը պետք է պարունակի հատուկ կոդ և տվյալ քաղաքացու անձնային տվյալները։ Հաղորդագրության միջոցով թույլտվություն ստանալու անհրաժեշտություն չկա այն դեպքում, երբ բնակության վայրը պետք է լքել կյանքին կամ առողջությանը սպառնացող վտանգից խուսափելու նպատակով։
Ապրիլի 19-ի դրությամբ Ադրբեջանում արձանագրվել է կորոնավիրուսով վարակվածության 1․398 դեպք։ Նրանցից 712 առողջացել են, 19-ը՝ մահացել, 667-ը շարունակում են բուժում ստանալ։
Հետևեք մեզ տելեգրամում
