Իսրայելի մասնակցությունն Արցախի կազմալուծման գործընթացին հանգեցրել է նաև Ադրբեջանում իսրայելական ազդեցության էական մեծացման և արդյունքում՝ Իրանի հյուսիսային սահմանների ուղղությամբ ռազմական և քաղաքական սպառնալիքների որակական փոփոխության և աճի։ Այսօր Երևանում մեկնարկած «Հարավային Կովկասը խզման գծերի երկայնքով․ տարածաշրջանային և միջազգային հեռանկարներ» խորագրով միջազգային գիտաժողովին ունեցած ելույթում նման տեսակետ է հայտնել արտակարգ և լիազոր դեսպան, ԼՂՀ նախկին արտգործնախարար (2004-2005թթ.) Արման Մելիքյանը։
Մելիքյանը զուգահեռներ է տարել Լեռնային Ղարաբաղից հայ բնակչության բռնի տեղահանումից շատ չանցած՝ Իսրայելի պաշտպանության բանակի կողմից Գազայում մեկնարկած ռազմագործողության և ԼՂ-ում Ադրբեջանի վարած քաղաքականության միջև։
«Իսրայելի գործողությունները Գազայի հատվածում իրականացվում են մի սցենարով, որը չափազանց նման է Արցախի դեպքին։ Ուշագրավ է, որ թե՛ Ադրբեջանը, և թե՛ Իսրայելն իրենց գործողությունները բնութագրել են որպես հակաահաբեկչական»,-ասել է Մելիքյանը՝ նշելով, որ երկուսի նպատակն էլ տարածքներն ու տեղի բնակչության արտաքսումն է եղել։
«Արցախում այդ նպատակն արդեն իրագործվել է։ Գազայի հատվածում այդ խնդիրն ավելի բարդ է։ Այնտեղ կա մոտ 2 միլիոն բնակիչ, մինչդեռ Արցախի հայ բնակչությունն արտաքսման պահին կազմում էր ընդամենը 120,000»,-նկատել է նա։
Մելիքյանն ուշադրություն է հրավիրել այն բանին, որ Իսրայելի հարձակումը նշանավորել է տարածաշրջանում (Լիբանանում, Սիրայում և այլն) Իրանի բոլոր դաշնակիցների դեմ լայնածավալ գործողությունների սկիզբը։
«Իրան-Չինաստան շատ սերտ և բազմաշերտ հարաբերությունների պայմաններում կարելի է հաստատել, որ Իրանին ուղղված սպառնալիքներն ավտոմատ կերպով անդրադառնում են նաև Չինաստանի շահերի վրա՝ առաջացնելով լուրջ ռիսկեր «Մեկ գոտի, մեկ ճանապարհ» ռազմավարության հաղորդակցության համակարգում՝ հարավային ճյուղի գործարկման և լիարժեք գործառութայնության համար»,-ընդգծել է գիտաժողովի բանախոսը։
Հետևեք մեզ տելեգրամում
