Մայիսի 7-ի գիշերը Հնդկաստանը հայտարարեց «Սինդուր» գործողության մեկնարկի մասին, որը նպատակ ունի հարվածել Պակիստանում «ահաբեկչական ենթակառուցվածքներին»։ Իսլամական Հանրապետությունը խոստացել է անհամաչափ պատասխան հարված հասցնել։
Reuters գործակալությունը, հղում անելով ականատեսներին, հաղորդել է Պակիստանի կողմից վերահսկվող Քաշմիրի վարչական կենտրոնի՝ Մուզաֆարաբադ քաղաքի մոտակայքում մի քանի պայթյունների մասին։ Հնդկաստանը իր հերթին հայտարարել է, որ հրթիռային հարվածներ է հասցրել Պակիստանում գտնվող ինը օբյեկտի ուղղությամբ։
Պակիստանի պաշտպանության նախարար Խավաջա Ասիֆը Հնդկաստանին մեղադրել է խաղաղ բնակիչների վրա հարձակվելու մեջ։ Իսլամաբադը Նյու Դելիի գործողությունները որակել է որպես «վախկոտ հարձակում» և հայտարարել է «վճռական պատասխանի» մասին։ Պակիստանը 48 ժամով փակել է իր օդային տարածքը և սկսել է պատասխան հարվածներ հասցնել։
Ըստ հնդկական PTI լրատվական գործակալության՝ Պակիստանի բանակը ինտենսիվ ականանետային հրետակոծություն է սկսել վերահսկողության գծի երկայնքով գտնվող գյուղերի ուղղությամբ, ինչի հետևանքով զոհվել է 3 խաղաղ բնակիչ։
Այս պահի դրությամբ՝ Պակիստանն ունի 26 զոհ, 46 վիրավոր։
Հետևեք մեզ տելեգրամում
