ԱՄՆ-ն 2,5 միլիարդ դոլար է խնայել Աֆղանստանում և Իրաքում Վրաստանի ռազմական առաքելություններին մասնակցության շնորհիվ: Այս մասին Վրաստանի վարչապետ Իրակլի Կոբախիձեն հայտարարել է «Իմեդի» հեռուստաալիքին տված հարցազրույցում։
«Ամերիկյան կողմը խնայեց 2,5 միլիարդ դոլար՝ շնորհիվ Աֆղանստանում և Իրաքում մեր առաքելությունների մասնակցության։ Միևնույն ժամանակ, ամերիկյան բյուջեից մեր երկրին տրամադրվող իրական ամերիկյան օգնությունը 2,5 միլիարդ դոլարից շատ ավելի քիչ է»,-ասել է Կոբախիձեն։
Վրաստանի կառավարության ղեկավարն ընդգծել է, որ նկատի չունի այն գումարը, որը Վրաստանին օգնության քողի տակ հատկացվել է ԱՄՆ Միջազգային զարգացման գործակալության (USAID) և Ժողովրդավարության ազգային հիմնադրամի (NED) միջոցով: Վարչապետի խոսքով՝ այս կազմակերպությունների միջոցով հատկացված գումարը ծախսվել է «երկրում անկարգություններ հրահրելու» վրա։
«Վրաստանին տրամադրված միակ օգնությունը եղել է 2008-2011 թվականներին, քանի որ դա անհրաժեշտ էր փրկել նախկին նախագահ Միխեիլ Սաակաշվիլիի ռեժիմը»,-հավելել է Կոբախիձեն։
Բացի այդ, Վրաստանի կառավարության ղեկավարի խոսքով, Վրաստանը ռազմական առաջադրանքներ կատարելիս կորցրել է 32 զինծառայողի։
«Արդարությունը միակ պահանջն է, որը մենք ներկայացնում ենք Թրամփի վարչակազմին»,-եզրափակել է Կոբախիձեն։
Հետևեք մեզ տելեգրամում
