Բաքուն շարունակում է նավթի մատակարարումն Իսրայելին․ թուրք քաղաքական գործիչ

Թուրքիայում քաղաքական մակարդակով հայտնել են, որ Ադրբեջանը շարունակում է նավթի մատակարարումն Իսրայելին՝ Բաքու-Թբիլիսի-Ջեյհան նավթամուղի միջոցով։ Հատկանշական է, որ այդ մասին բարձրաձայնում են հիմնականում իսլամետ գործիչներն ու ԶԼՄ-ները, որոնց չի գոհացնում Ադրբեջանի լռությունն ինչպես Գազայում Իսրայելի գործողությունների, այնպես էլ այս օրերին Իրանի դեմ Իսրայելի հարձակումների հարցում։

Հունիսի 16-ին խնդրին անդրադարձել է թուրքական իսլամիստական «Նոր բարօրություն» կուսակցության առաջնորդ Ֆաթիհ Էրբաքանը, որը Թուրքիայի նախկին վարչապետ Նեջմեթթին Էրբաքանի որդին է։

«Նոր Բարօրություն» կուսակցության առաջնորդը, որը չորս պատգամավորով ներկայացված է նաև Թուրքիայի Ազգային մեծ ժողովում, մասնավորապես հայտարարել է․ «Որպես «Նոր Բարօրություն» կուսակցություն երկար ժամանակ է, ինչ ասում ենք, որ անպայման պետք է դադարեցնել ադրբեջանական նավթի մատակարարումն Իսրայելին Թուրքիայի տարածքով։ Բաքու-Թբիլիսի-Ջեյհան նավթամուղի փականների փակումը ծայրաստիճան կարևոր է»։

Օրեր առաջ թուրքական մի շարք լրատվամիջոցներ ևս գրել էին, որ Ադրբեջանն Իսրայելին խոստացել է շարունակել նավթի մատակարարումը՝ չնայած հակառակը պնդող բոլոր հայտարարություններին։

Իսլամամետ թուրքական թերթերից Yeni Akit-ը, հղում անելով իսրայելական Haaretz-ին, հայտնել էր, որ Ադրբեջանն այդ խոստումը տվել է՝ չնայած նրան, որ նախորդ տարի մաքսային արձանագրություններից հանել է Իսրայելին նավթի վաճառքը՝ այն էլ Թուրքիայի ճնշմամբ։

Կայքը հայտնել է, որ Haaretz-ին իսրայելական աղբյուրներն ասել են, որ նավթի վաճառքը շարունակվում է։ Իսկ մաքսային գրառումների փոփոխությունը պայմանավորված է նրանով, որ գործարքները կատարվում են երրորդ երկրներում գրանցված առևտրականների հետ, ուստի Իսրայելն անհանգստանալու առիթ չունի։ 

Ֆաթիհ Էրբաքանը միաժամանակ կոչ է արել իսլամական ութնյակի (D8) գագաթնաժողով գումարել Ստամբուլում։ Ադրբեջանն այդ կազմակերպությանն անդամակցել է 2024-ին։ Կազմակերպության հիմնադիր անդամներից է նաև Իրանը։