Տարածաշրջանային և երկկողմ համագործակցության հարցերը Վրաստանի նախագահ Միխեիլ Ղավելաշվիլիի և Թուրքիայի նախագահ Ռեջեփ Թայիփ Էրդողանի հանդիպման հիմնական թեման էին։ Ղավելաշվիլին պաշտոնական այցով Անկարա է ժամանել օգոստոսի 12-ին։
«Այսօր բարձր մակարդակի հանդիպումների ժամանակ մենք քննարկեցինք Վրաստանի և Թուրքիայի միջև երկկողմ և բազմակողմ հարաբերությունների ակտիվ օրակարգը, մտքեր փոխանակեցինք տարածաշրջանային կարևոր հարցերի շուրջ և նախանշեցինք ապագա համագործակցության հեռանկարները»,-ասել է Ղավելաշվիլին։
Նախագահի խոսքով՝ Թուրքիան Վրաստանի թիվ մեկ առևտրային գործընկերն է, և կարևոր է խթանել Վրաստանից արտահանման աճը, որպեսզի ազատ առևտրի համաձայնագիրը հավասար օգուտներ բերի երկու կողմերին էլ։
Ինչպես նշել է Վրաստանի նախագահը, հանդիպմանը քննարկվել է Միջին միջանցքի հայեցակարգը և դրա նշանակությունը։
«Նշվել է Բաքու-Թբիլիսի-Ջեյհան նավթատարի, Բաքու-Թբիլիսի-Էրզրում գազատարի, Բաքու-Թբիլիսի-Կարս երկաթուղու և Հարավային գազային միջանցքի նախագծերի կարևորությունը, որոնք նոր երանգ են հաղորդում մեր երկրների դերին և գործառույթին համաշխարհային աշխարհաքաղաքական տարածքում։ Բացի այդ, մենք քննարկել ենք մշակույթի, կրթության և ժողովուրդների միջև հարաբերությունների ոլորտներում համագործակցության հեռանկարները»,-ասել է Ղավելաշվիլին։
Վրաստանի նախագահը Ռեջեփ Թայիփ Էրդողանին հրավիրել է Թբիլիսի։
Հետևեք մեզ տելեգրամում
