Իրանի և Ատոմային էներգիայի միջազգային գործակալության (ԱԷՄԳ) ներկայացուցիչների միջև բանակցությունները կարող են տեղի ունենալ առաջիկա օրերին։ Այս մասին հայտարարել է Իրանի ԱԳՆ խոսնակ Էսմայիլ Բաղաեին։
«Հնարավոր է, որ գործակալության հետ բանակցությունների ևս մեկ փուլ տեղի ունենա առաջիկա օրերին»,-ասել է նա մամուլի ասուլիսի ժամանակ։
Օգոստոսի 11-ին՝ Թեհրանում Իրանի պաշտոնյաների և ԱԷՄԳ-ի ներկայացուցչի միջև կայացած բանակցություններից հետո, Իսլամական Հանրապետության փոխարտգործնախարար Քազեմ Ղարիբաբադին հայտնել էր, որ կողմերը համաձայնության են եկել շարունակել խորհրդակցությունները Իրանի միջուկային ծրագրի շուրջ։ Դիվանագետը մանրամասնել է, որ ԱԷՄԳ-ի գլխավոր տնօրենի տեղակալ Մասսիմո Ապարոյի հետ հանդիպման ժամանակ քննարկվել է Թեհրանի և գործակալության միջև փոխգործակցության ձևաչափը ներկայիս պայմաններում։ Ղարիբաբադին նշել է, որ իրանական կողմը բողոք է հայտնել ԱԷՄԳ-ի կողմից Իրանի վրա Իսրայելի և ԱՄՆ-ի հարձակման ժամանակ իր պարտավորությունները չկատարելու կապակցությամբ։
Հետևեք մեզ տելեգրամում
