Իրանի արտգործնախարար Աբբաս Արաղչին պաշտոնական նամակներ է ուղարկել ԵՄ բարձր ներկայացուցիչ Կայա Կալասին, ՄԱԿ-ի գլխավոր քարտուղարին և Անվտանգության խորհրդին՝ արձագանքելով Ֆրանսիայի, Գերմանիայի և Մեծ Բրիտանիայի՝ Իրանի դեմ պատժամիջոցների վերականգնման մեխանիզմը (snapback mechanism) գործարկելու որոշմանը։
Արաղչին մերժել է եվրաեռյակի պնդումերը և քննադատել է փաստերը խեղաթյուրելու ու Իրանի գործողությունները անօրինական ներկայացնելու փորձերը։
Նա նշել է, որ Իրանը պատրաստ է արդյունավետ դիվանագիտական բանակցությունների՝ նոր համաձայնության հասնելու համար, որը կապահովի ինչպես Իրանի իրավունքները, այնպես էլ մյուս կողմերի մտահոգությունների լուծումը։
Նշենք, որ մինչ այդ եվրաեռյակի արտգործնախարարները և ԵՄ բարձր ներկայացուցիչը հեռախոսազրույցի ընթացքում Իրանի ԱԳ նախարար Աբբաս Արաղչիին տեղեկացրել են, որ պատրաստվում են ՄԱԿ-ի Անվտանգության խորհրդին պաշտոնապես դիմել՝ սկսելու պատժամիջոցների վերականգնման մեխանիզմի (snapback mechanism) գործընթացը։ Միաժամանակ նրանք ընդգծել են, որ առաջիկա 30 օրում պատրաստ են դիվանագիտական ճանապարհով լուծում գտնել, որպեսզի կանխեն ՄԱԿ-ի Անվտանգության խորհրդի պատժամիջոցային բանաձևերի վերականգնումը։
Հետևեք մեզ տելեգրամում
