Բելգիան սեպտեմբերին կայանալիք ՄԱԿ-ի Գլխավոր ասամբլեայի նստաշրջանում կճանաչի Պաղեստին պետությունը և պատժամիջոցներ կկիրառի Իսրայելի նկատմամբ։ Այս մասին հայտարարել է Թագավորության արտաքին գործերի նախարար Մաքսիմ Պրևոն։
«Բելգիան կճանաչի Պաղեստինը ՄԱԿ-ի նստաշրջանում։ Իսկ Իսրայելի իշխանությունների նկատմամբ կկիրառվեն խիստ պատժամիջոցներ։ «ՀԱՄԱՍ»-ի կողմից հակասեմիտիզմի և ահաբեկչության գովաբանման ցանկացած դրսևորում նույնպես խստորեն կդատապարտվի»,-X-ում գրել է նա։
Պրևոն պարզաբանել է, որ Բելգիան մտադիր է ճանաչել Պաղեստինի պետությունը Ֆրանսիայի և Սաուդյան Արաբիայի համատեղ նախաձեռնության շրջանակներում։
Բելգիայի արտաքին գործերի նախարարության ղեկավարը հավելել է, որ Իսրայելի դեմ պատժամիջոցները կներառեն իսրայելական բնակավայրերից ներմուծման արգելք, իսրայելական ընկերություններից պետական գնումների քաղաքականության վերանայում, «միջազգային իրավունքի համաձայն անօրինական համարվող բնակավայրերում բնակվող» բելգիացիներին հյուպատոսական օգնության սահմանափակումներ, ինչպես նաև դատական գործընթացներ, մի շարք անձանց համար Բելգիայի տարածքով թռիչքների և տարանցման սահմանափակումներ:
Բացի այդ, ըստ Պրևոյի, Բելգիան իսրայելցի երկու նախարարների, իսրայելցի գաղութաբնակների և «ՀԱՄԱՍ»-ի առաջնորդների կհայտարարի անցանկալի անձ: Ըստ «Le Soir»-ի, խոսքը ազգային անվտանգության նախարար Իտամար Բեն Գվիրի և ֆինանսների նախարար Բեզալել Սմոտրիչի մասին է:
Հիշեցնենք, որ Պաղեստինը ճանաչելու մասին հայտնել է նաև Մեծ Բրիտանիան:
Հետևեք մեզ տելեգրամում
