Թուրքիայի նախագահ Ռեջեփ Թայիփ Էրդողանը Չինաստանից վերադարձի ճանապարհին ինքնաթիռում պատասխանել է լրագրողների հարցերին՝ անդրադառնալով Վաշինգտոնում Հայաստանի ու Ադրբեջանի միջև ձեռք բերված պայմանավորվածություններին:
«Հավատում եմ, որ Հրվ․ Կովկասը, կհասնի խաղաղությանը, որին կարոտ է։ Ալիևի հետ ունեցածս երկկողմ հանդիպմանը նրա մոտ ևս այդ հույսը տեսա։ Սպիտակ տանը դրված ստորագրությունները, անշուշտ, արագություն հաղորդեցին Հայաստան-Ադրբեջան կարգավորման գործընթացին։ Ադրբեջանն ու Հայաստանը խաղաղության ճանապարհին զգալիորեն հաղթահարել են անհարթությունները և հասել են վերջին կետին։ Մենք մանրամասն քննարկում ունեցանք Ադրբեջանի նախագահի ապա՝ Հայաստանի վարչապետի հետ։ Երկու հանդիպումներում էլ տեսա, որ թե՛ Ալիևը, թե՛ Փաշինյանը նույն դիրքորոշմանն են», ասել է նա։
Էրդողանը նաև նշել է, որ խաղաղության հաստատմամբ տարածաշրջանում ցամաքային և երկաթգծային ուղիները ակտիվանալու են, սահմանային անցակետերը բացվելու են, առևտրի գլխավորությամբ՝ բազմաթիվ ոլորտներ դրական ազդեցություն է կրելու՝ ավելացնելով, որ դրանից Թուրքիան և տարածաշրջանային մյուս երկրները շահելու են, իսկ Ռուսաստանն ու Իրանը հասկանալու են, որ իրենց մտահոգություններն անտեղի են։
Հետևեք մեզ տելեգրամում
