Իրանում ներկա պահին գործող 10-րդ գումարման խորհրդարանը մայիսի 26-ին պաշտոնապես կդադարեցնի իր աշխատանքը: Այս մասին հայտարարել է Իրանի օրենսդիր մարմնի նախագահության ներկայացուցիչ Ասադուլլահ Աբասին:
«10-րդ գումարման խորհրդարանի աշխատանքի վերջնական ամսաթիվը մայիսի 26-ն է»,- Աբասիին մեջբերում է խորհրդարանի մամլո ծառայությունը:
Նա նշել է, որ խորհրդարանի բաց նիստերը կանցկացվեն մինչև մայիսի 20-ը, որից հետո նման նիստեր չեն կայանա՝ պայմանավորված մուսուլմանների շրջանում նշվող տոնով, որով ավարտվում է Ռամադանի պահքը:
Նշենք, որ փետրվարի 21-ին Իրանում 11-րդ գումարման խորհրդարանի ընտրություններ էին անցկացվել: 290 պատգամավորական մանդատի համար պայքարում էին ավելի քան 7000 մարդ: Բացարձակ մեծամասնությունը բաժին է հասել պահպանողականներին: Մանդատների բաշխման վերջնական արդյունքները հայտնի կդառնան ավելի ուշ, քանի որ մի շարք շրջաններում նախատեսվում է ընտրությունների երկրորդ փուլ անցկացնել:
Հետևեք մեզ տելեգրամում
