Հետազոտական ռեսուրսների կովկասյան կենտրոն-Վրաստանը (CRRC) սոցհարցում է անցկացրել ԵՄ-ի և առանց վիզայի ռեժիմի հնարավոր չեղարկման մասին վրաստանցիների հանրային կարծիքի վերաբերյալ։ Հարցումն իրականացվել է «Քաղաքացիական հասարակության հիմնադրամ»-ի պատվերով և Եվրամիության ֆինանսական աջակցությամբ։ Հեռախոսային հարցմանը մասնակցել է 1333 հոգի, հարցումն անցկացվել է 2024թ․ օգոստոսի 8-12-ը։
Ըստ հարցման՝ Վրաստանի քաղաքացիների մեծամասնությունը կարծում է, որ ԵՄ-ի հետ առանց վիզայի ռեժիմի կասեցումը կվնասի երկրի քաղաքացիներին։ Միևնույն ժամանակ, եթե առանց վիզայի ռեժիմը իսկապես կասեցվի, բնակչության կեսից ավելին պատասխանատու է համարում կառավարությանը։
ԵՄ անդամակցության աջակցությունը Վրաստանի բնակչության շրջանում շարունակում է բարձր մնալ: Հարցվածների 78%-ը աջակցում է ԵՄ անդամակցությանը: Երիտասարդների (18-34) շրջանում Վրաստանի ԵՄ անդամակցության աջակցության մակարդակն ավելի բարձր է՝ 86%: Ավելի մեծ տարիքային խմբերի շրջանում աջակցության մակարդակը փոքր-ինչ նվազում է, սակայն ճնշող մեծամասնությունը դեռևս աջակցում է ԵՄ անդամակցությանը. 76%-ը՝ 35-54 տարիքային խմբում և 71%-ը՝ 55+ տարիքային խմբում:
Հարցման արդյունքների համաձայն՝ վերջին 8 տարվա ընթացքում բնակչության 22%-ը առնվազն մեկ անգամ առանց վիզայի մեկնել է ԵՄ որևէ երկիր: Երիտասարդների (18-34 տարեկան) շրջանում այս ցուցանիշը հասնում է 33%-ի, միջին տարիքի քաղաքացիների շրջանում՝ 23%-ի, իսկ տարեց բնակչության շրջանում՝ 12%-ի: Տղամարդկանց շրջանում ավելի մեծ մասնաբաժին (26%) է մեկնել ԵՄ առանց վիզայի, քան՝ կանանց շրջանում (18%):
Վրաստանի բնակչության ճնշող մեծամասնությունը (78%) կարծում է, որ ԵՄ-ի հետ առանց վիզայի ճանապարհորդության կասեցումը վնասակար կլինի Վրաստանի քաղաքացիների համար: Հարցվածների 14%-ը կարծում է, որ առանց վիզայի ռեժիմի կասեցումը ոչինչ չի փոխի։
Շեշտվում է, որ հարցման արդյունքները ներկայացուցչական են Վրաստանի վրացախոս չափահաս բնակչության համար:
Հետևեք մեզ տելեգրամում
