Իրանի արտաքին գործերի նախարարության մամուլի խոսնակ Էսմայիլ Բաղաեին X-ի միկրոբլոգում իր հիացմունքն է հայտնել Պերսեպոլիսի պատմական հուշարձան-համալիրի տարածքում սեպտեմբերի 6-ին կայացած Հայաստանի ազգային ֆիլհարմոնիկ նվագախմբի 100-ամյակին նվիրված բացօթյա համերգի կապակցությամբ:
Համերգը տեղի է ունեցել ՀՀ կրթության, գիտության, մշակույթի և սպորտի նախարար Ժաննա Անդրեասյանի գլխավորած պատվիրակության՝ Իրանի Իսլամական Հանրապետություն այցի շրջանակում։
«Հայաստանի ֆիլհարմոնիկ նվագախմբի կողմից Թախտէ Ջամշիդում «Էյ Իրան» ստեղծագործության շքեղ կատարումը ոչ միայն անզուգական մշակութային իրադարձություն էր, այլև Իրան-Հայաստան բարեկամության և հարգանքի խորհրդանիշ, ինչպես նաև երկու ժողովուրդների միջև մշակութային և պատմական խորը կապերի դրսևորում»,-X-ի իր էջում գրել է Իրանի ԱԳՆ խոսնակ Էսմայիլ Բաղաեին:
Այս բացառիկ իրադարձությանը ներկա են եղել ՀՀ ԿԳՄՍ նախարար Ժաննա Անդրեասյանը, Իրանի Իսլամական Հանրապետության մշակութային ժառանգության, զբոսաշրջության և ձեռարվեստի նախարար Սեյեդ Ռեզա Սալեհի Ամիրին, ԻԻՀ Ֆարսի նահանգապետ Հոսեյն Ալի Ամիրին, ԻԻՀ-ում ՀՀ արտակարգ և լիազոր դեսպան Գրիգոր Հակոբյանը, բարձրաստիճան այլ պաշտոնյաներ:
«Այսօրվա հոբելյանական համերգը՝ հնչող բարձրարվեստ երաժշտությամբ, վեր է քաղաքական սահմաններից. այն խոսք է համամարդկային արժեքների, խաղաղության, համագործակցության և մշակույթների ներդաշնակ համակեցության մասին։ Հատկապես խորհրդանշական է, որ այսօրվա համերգը տեղի է ունենում Պերսեպոլիսի հրապարակում՝ մի վայրում, որը հիշարժան է բոլորիս համար, քանի որ հենց այստեղ՝ հնագույն աշխարհի կարևորագույն վավերագրություններից մեկում՝ Բեհիսթունյան արձանագրությունում, մեր ժողովրդի մասին կատարվել է առաջին գրավոր պատմական հիշատակումը»,- իր խոսքում նշել է Ժաննա Անդրեասյանը և հավելել, – «Շիրազի այդ հոյակերտ ճարտարապետական համալիրը, որն իրավամբ համաշխարհային ժառանգության գոհարներից է, ընդգրկված է ՅՈՒՆԵՍԿՕ-ի Համաշխարհային ժառանգության ցանկում և մեր Էրեբունի պատմական մայրաքաղաք-ամրոցի հետ միասին հանդիսանում է հնագույն քաղաքակրթության կանգուն վկայություն։ Հայաստանի և Իրանի մշակութային կապերը գալիս են դարերի խորքից․ մշակութային երկխոսությունը նոր շունչ է ստանում Պերսեպոլիսում, որն անցել է դարերի փորձություններով և մարմնավորում է մարդկային մտքի ու երևակայության նվաճումները։ Հպարտ եմ և ակնածանքով լի, որ այս հինավուրց պատերի տակ հնչելու է հայ երաժշտությունը, և իր 100-ամյակը նշող Հայաստանի ազգային ֆիլհարմոնիկ նվագախումբը, որը ելույթներով հանդես է եկել աշխարհի լավագույն բեմերում, իր հոբելյանը նշում է նաև մեր հարևան և բարեկամ երկրում՝ Իրանի Իսլամական Հանրապետությունում։ Այսօրվա համերգը ոչ միայն հարգանքի տուրք է անցյալին, այլև պատգամն է ապագայի, քանի որ արվեստը ոսկե կամուրջ է ժողովուրդների, մշակույթների և սերունդների միջև։ Թող այսօրվա հիշարժան համերգի հնչյունները շարունակեն հյուսել մշակութային կամուրջներ Հայաստանի և Իրանի բարեկամ ժողովուրդների միջև»։
Ողջույնի խոսքով հանդես է եկել նաև ԻԻՀ-ում ՀՀ արտակարգ և լիազոր դեսպան Գրիգոր Հակոբյանը՝ ընդգծելով, որ Հայաստանի ֆիլհարմոնիկ նվագախմբի հոբելյանական համերգի կազմակերպմանը գործուն աջակցություն է ցուցաբերել իրանական կողմը։ «Մենք կանգնած ենք պատմության անմահության և մշակույթի հզորության շեմին։ Պերսեպոլիսի հնագույն սյուները, ժողովուրդների հոյակերտ դարպասը, ժայռափոր հուշարձաններն ապշեցնում են իրենց հզորությամբ և կենդանի շնչով։ Սա առասպելների, քաղաքակրթության և աներևակայելի իրականության խաչմերուկ է, որտեղ միաձուլվում են անցյալն ու ներկան։ Մենք զգում ենք երկու աշխարհների՝ Հայաստանի և Իրանի պատմական ու մշակութային ամուր կապը, որի կամուրջն է նաև այս համերգը: Կամուրջ՝ երկու հինավուրց պետությունների, հազարամյակների պատմական փորձ կիսող երկու ժողովուրդների միջև»,- իր խոսքոմ նշել է դեսպանը։
Ծրագրում հնչել են Սայաթ-Նովայի «Իմ քամանչա» արիան Ալեքսանդր Հարությունյանի «Սայաթ-Նովա» օպերայից, Կոնստանտին Պետրոսյանի «Հայաստան» և Ռոբերտ Ամիրխանյանի «Երազ իմ երկիր հայրենի» երգերը։ Հնչել է նաև Ռուհոլլահ Խալեղիի «Ո՜վ Իրան» հայրենասիրական երգը: Երեկոյի գագաթնակետը Արամ Խաչատրյանի մեծակտավ Սիմֆոնիա թիվ 2-ի կատարումն էր:
Հետևեք մեզ տելեգրամում
