Հայաստանը, Հնդկաստանը և Իրանը եռակողմ բանակցություններ կանցկացնեն

Հնդկաստանի, Հայաստանի և Իրանի միջև առաջիկայում եռակողմ հանդիպում կկայանա, որի ընթացքում քննարկվելու է Հնդկաստանի և Հայաստանի միջև Իրանի տարածքով տրանսպորտային հաղորդակցության հաստատման հնարավորությունը։ Այդ մասին հայտնում է «The Economic Times»-ը։

Պարբերականի աղբյուրների համաձայն՝ Հնդկաստանն ու Իրանն այս շաբաթ Թեհրանում ԱԳՆ մակարդակով երկկողմ խորհրդակցություններ կանցկացնեն՝ երկու երկրների հարաբերությունները ամրապնդելու նպատակով։ Բանակցությունների օրակարգում կլինի նաև Իրանի Չաբահար նավահանգստի, ինչպես նաև «Հյուսիս–Հարավ» միջազգային տրանսպորտային միջանցքի գործունեության ակտիվացումը։

Երկկողմ Հնդկաստան–Իրան հանդիպումներին կհետևի Հնդկաստան–Իրան–Հայաստան եռակողմ հանդիպումը, որի նպատակն է ամրապնդել տարածաշրջանային տրանսպորտային կապերը և ստեղծել նոր տրանսպորտային ուղիներ Հայաստանի և Հնդկաստանի միջև։