Կանխվել է մեծ քանակությամբ թմրանյութերի մուտքը Ադրբեջան (տեսանյութ)

Ադրբեջանի սահմանապահ ծառայության աշխատակիցները կանխել են շուրջ 115 կգ թմրանյութերի և զինամթերքի ներկրումը երկիր։

«Մայիսի 4-ին ժամը 23։30-ին «Հորադիզ» սահմանային ուղեկալում՝ Բեյլագանի շրջանի Ահմեթլի գյուղի մոտակայքում, նկատվել է տարածքին մոտեցող  VAZ -2107 մակնիշի ավտոմեքենա: Մեքենայից մի մարդ է դուրս եկել և վերցրել է ծառի տակ թաքցված մի քանի կապոց, ինչից հետո սահմանապահները հրահանգել են նրան կանգնել։ Վերջինս  չի ենթարկվել հրահանգին և փորձել է փախչել, բայց սահմանապահներին հաջողվել է կանգնեցնել նրան։ VAZ -2107-ի վարորդին հաջողվել է հեռանալ դեպքի վայրից», – ասված է սահմանապահ ծառայության մամուլի բաժնի հայտարարության մեջ։ Նշվում է , որ այս պահին իրավապահները փորձում են պարզել վարորդի ինքնությունը և գտնվելու վայրը։

Իսկ ձերբակալվածի անձը պարզվել է․ նա Ռուսաստանի քաղաքացի, Ֆիզուլիի շրջանում բնակվող Մեհդիև Շուքյուր Ասկերօղլուն է։ Խուզարկության արդյունքում վերջինիս մոտ հայտնաբերվել է 115 կգ հերոին, մարիխուանա և մեթամֆետամին տեսակի թմրամիջոց,1 «Pak Retay -11»  ատրճանակ,  «Kral Magnum» որսորդական հրացան և այլ զինամթերք։