Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի պատրաստվում հանդուրժել Սիրիայի հյուսիս-արևելյան շրջանների դեմ կառավարական ուժերի և ահաբեկչական խմբավորումների հարձակումները։ Էրդողանի խոսքով՝ նման գործողությունների շարունակականության դեպքում Թուրքիան ռազմական քայլեր կձեռնարկի։
«Մենք այլևս չենք հանդուրժի հարձակումները, որոնցով խախտվում են անվտանգության գոտու (Սիրիայի հյուսիսի) վերաբերյալ մեր պայմանավորվածությունները։ Եթե ռեժիմը և ահաբեկչական խմբավորումը չվերահսկեն իրենց գործողությունները, մենք համապատասխան քայլեր կձեռնարկենք», – հայտարարել է Էրդողանը։
Հիշեցնենք, որ իրավիճակն Իդլիբում սրվել էր փետրվարի վերջին, երբ «Հայաթ Թահրիր աշ Շամ» խմբավորման զինյալները մեծամասշտաբ հարձակում սկսեցին սիրիական կառավարական ուժերի դիրքերի դեմ։ Սիրիական բանակը պատասխան կրակ էր բացել։ ՌԴ պաշտպանության նախարարության տվյալներով՝ թիրախում էր հայտնվել նաև թուրքական զինուժը, որը իրականում այնտեղ չպետք է գտնվեր։
ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի՝ մարտի 5-ին կայացած հանդիպումից հետո իրավիճակը հաջողվեց կայունացնել։ Կողմերն ընդունեցին փաստաթուղթ՝ վերահաստատելով իրենց հավատարմությունը «Աստանայի ձևաչափին» և հայտարարեցին հրադադարի ռեժիմ հաստատելու մասին։ Բացի այդ՝ Թուրքիայի և Ռուսաստանի միջև պայմանավորվածություն ձեռք բերվեց կարևոր նշանակություն ունեցող M4 մայրուղում համատեղ պարեկություն իրականացնելու վերաբերյալ։
Հետևեք մեզ տելեգրամում
