Իրանի պաշտպանության նախարար Ամիր Ազիզ Նասիրզադեն պաշտոնական այցով մեկնել է Թուրքիա: Նասիրզադեն Թուրքիայում անդրադարձել է երկու եկրների միջև առկա ռազմական հարաբերություններին և նշել, որ դրանց ամրապնդումը նպաստում է սահմանային կայունությանն ու անվտանգությանը:
Իրանական «Tesnim» լրատվական գործակալության հետ զրույցում վերջինս հայտնել է, որ Թուրքիայի պաշտպանության նախարար Յաշար Գյուլերի հրավերով է մեկնել Թուրքիա և պատրաստվում է հանդիպումներ ունենալ թուրքական ռազմական և անվտանգային գերատեսչությունների ներկայացուցիչների հետ:
Բացի այդ Իրանի ռազմական գերատեսչության ղեկավարը Թուրքիան և Իրանը որակել է որպես «տարածաշրջանում և իսլամական աշխարհում երկու ազդեցիկ և կարևոր մուսուլման երկրներ»:
Իրանի պաշտպանության նախարարը նշել է, որ Իրանն ու Թուրքիան կարող են տարածաշրջանի երկրների համար միության և համագործակցության օրինակ դառնալ։ Նա շեշտել է, որ երկու երկրների մշակութային ու կրոնական ընդհանրությունները շատ են, իսկ տարաձայնությունները՝ չնչին։ Նասերզադեն ընդգծել է, որ պաշտպանական կապերի զարգացումը կարող է օգնել իսլամական աշխարհի և տարածաշրջանի խնդիրների լուծմանը։
Նասիրզադեն Թուրքիայի նախարարին հրավիրել է Թեհրան։ Գյուլերը, իր հերթին, կարևորել է Իրանի ՊՆ նախարարի այցն՝ այն համարելով երկու երկրների բարեկամության նշան։ Նա հայտնել է պատրաստակամություն «ահաբեկչության դեմ պայքար»-ի և տարածաշրջանային անվտանգության ապահովման ուղղությամբ համատեղ գործողությունների համար։ Գյուլերն ընդգծել է․
«Ինչպես որ Իրանը Թուրքիայի անվտանգությունը համարում է սեփական անվտանգություն, այնպես էլ Թուրքիան իր բոլոր ջանքերը կներդնի անվտանգության ամրապնդման, հատկապես ընդհանուր սահմանների երկայնքով»։
Հետևեք մեզ տելեգրամում
