Հայաստանի արտաքին գործերի նախարար Արարատ Միրզոյանը հարցազրույց է տվել գերմանական «Deutsche Welle»-ին, որտեղ անդրադարձել է հայ-թուրքական հարաբերություններին։
Նա նշել է, որ Հայաստանի և Թուրքիայի միջև սահմանը կարող է բացվել առաջիկա մի քանի ամիսների ընթացքում, և այդ ժամանակ կարող են հաստատվել նաև երկու երկրների միջև դիվանագիտական հարաբերություններ։
«Ես անձամբ որևէ խնդիր չեմ տեսնում հայ-թուրքական սահմանի բացման հետ կապված, ինչպես նաև չեմ տեսնում որևէ խնդիր հայ-թուրքական դիվանագիտական հարաբերությունների հաստատման հետ կապված։ Մեր թուրք գործընկերները նույնպես հաստատել են դա։ Հետևաբար, կարծում եմ, որ առաջիկա շաբաթների և ամիսների ընթացքում մենք շատ շոշափելի առաջընթացի կհասնենք այս ուղղությամբ։ Դա, չգիտեմ, առավելագույնը մի քանի ամսվա հարց է։ Սա իմ ընկալումն է։ Կտեսնենք, թե ինչպես կզարգանան իրադարձությունները»,- ընդգծել է ՀՀ արտգործնախարարը։
Միրզոյանի խոսքով՝ Թուրքիան ընդգծել է, որ չի կարող ավարտել Հայաստանի հետ սահմանի բացման գործընթացը առանց Երևանի և Բաքվի միջև հարաբերությունների կարգավորման։ Սակայն Հայաստանի և Ադրբեջանի միջև խաղաղության համաձայնագիրն այժմ նախաստորագրվել է, ինչը հնարավորություն է տալիս երկկողմ հարաբերություններ հաստատել Երևանի և Անկարայի միջև։
«Թուրքական կողմը արտահայտել և ցուցադրել է իր պատրաստակամությունը՝ բացելու սահմանները, վերսկսելու երկաթուղային հաղորդակցությունը և երկկողմ ուղիղ առևտուրը, նույնիսկ չնշելով դիվանագիտական հարաբերություններ հաստատելու հարցը», — հավելել է Միրզոյանը։
Հետևեք մեզ տելեգրամում
