Ազգային ժողովում քննարկվում է «Տեսալսողական մեդիայի մասին» օրենքում փոփոխություններ կատարելու օրենսդրական նախաձեռնությունը, որով առաջարկվում է հանրային հեռարձակողների նվազագույն թիվը երեքից դարձնել երկու։
«Արմենպրես»-ի հաղորդմամբ՝ նախագծի համահեղինակ, «Քաղաքացիական պայմանագիր» խմբակցության պատգամավոր Թագուհի Ղազարյանը նշեց, որ նախաձեռնության նպատակն է հանրային միջոցների ավելի արդյունավետ օգտագործումը։
«Նախագծով առաջարկվում է հանրային հեռարձակողների թիվը նվազագույն սահմանված 3 շեմից իջեցնել 2-ի։ Սա չի նշանակում, որ դրանք չեն կարող լինել ավելի շատ, պարզապես ակնկալում ենք միջոցների ավելի արդյունավետ բաշխում։ Նախորդ տարիներին հանրային հեռարձակողներից մեկի հետ պետությունը մեկ անձից գնումների եղանակով շուրջ 3 միլիարդ դրամի պայմանագրեր է կնքել առանց մրցույթի։ Մենք գտնում ենք, որ այս միջոցները կարող են ավելի նպատակային ծախսվել»,-ասաց Ղազարյանը։
Պատգամավորի խոսքով՝ նոր կարգավորումները հնարավորություն կտան, որ կրթական և մշակութային բովանդակության համար նախատեսված հանրային միջոցները բաշխվեն մուլտիպլեքսի բոլոր հեռուստաընկերությունների միջև՝ ապահովելով հավասար մրցակցային պայմաններ և բովանդակության բազմազանություն։
Քննարկման ընթացքում անկախ պատգամավոր Գեղամ Նազարյանը հարց ուղղեց, թե արդյոք նախաձեռնությունը միտվա՞ծ չէ «Շողակաթ» հեռուստաալիքը փակելուն։
«Մտահոգություն կա, որ այս նախաձեռնության հիմնական նպատակը «Շողակաթ» հեռուստաալիքի փակումն է։ Ես կուզեի Ձեր հստակ դիրքորոշումը լսել»,-ասաց Նազարյանը։
Պատասխանելով պատգամավորի հարցին՝ Թագուհի Ղազարյանը հաստատեց, որ նախագիծը, մասնավորապես, վերաբերում է «Շողակաթ» ՍՊԸ-ին։
«Այո, նախաձեռնությունը, մասնավորապես, «Շողակաթ» ՍՊԸ-ի հետ կապված խնդիրներն է կարգավորելու, քանի որ տարիների ընթացքում շուրջ 3 միլիարդ դրամ է հատկացվել մեկ կազմակերպության՝ առանց մրցույթի։ Մենք այս հարցը բարձրացրել ենք մի քանի անգամ։ Մրցակցային դաշտը միայն կբարձրացնի որակը և բովանդակությունը»,– ընդգծեց Ղազարյանը։
Գեղամ Նազարյանը նշեց, որ իշխանությունը պետք է փորձի բարելավել հեռուստաալիքի աշխատանքը, այլ ոչ թե փակել այն։
«Եթե պարզվում է, որ միջոցները արդյունավետ չեն ծախսվել, դա չի նշանակում, որ պետք է հեռուստաալիքը փակել։ Եթե, օրինակ, Մատենադարանում նման խնդիր լինի, մենք չենք փակի Մատենադարանը։ Ես հորդորում եմ հետ կանգնել այդ քայլից, քանի որ «Շողակաթ»-ի փակումը հասարակության մոտ կձևավորի տպավորություն, թե կառավարությունը հակաեկեղեցական քայլեր է ձեռնարկում»,-ասաց Նազարյանը։
Արձագանքելով Նազարյանին՝ Թագուհի Ղազարյանն ասաց, որ խոսքը փակման մասին չէ, այլ մրցակցային պայմանների հավասարեցման։
«Ես չեմ կարծում, թե «փակել» բառը տեղին է։ Եթե «Շողակաթ»-ը ունի ենթակառուցվածքներ և կարող է մասնակցել մուլտիպլեքսի մրցույթներին՝ հավասար պայմաններով, թող մասնակցի և հաղթի։ Խոսքը արտոնությունների վերացման մասին է, ոչ թե գործունեության դադարեցման»,-ասաց պատգամավորը։
Հետևեք մեզ տելեգրամում
