Մարդու իրավունքների եվրոպական դատարանը (ՄԻԵԴ) որոշում է կայացրել ի օգուտ Ադրբեջանի իշխանությունների դեմ բողոք ներկայացրած ադրբեջանցի լրագրող Խադիջա Իսմաիլովայի։
ՄԻԵԴ-ի որոշման համաձայն՝ Ադրբեջանի իշխանությունները չեն կարողացել ապահովել Իսմաիլովայի՝ անձնական կյանքի անձեռնամխելիության իրավունքի իրացումը, ինչը հակասում է Մարդու իրավունքների եվրոպական կոնվենցիայի 8-րդ հոդվածին։
«Amnesty International» իրավապաշտպան կազմակերպության՝ Հարավային Կովկասի հարցերով մասնագետ Նատալիա Նոզաձեն հայտարարել է, որ ՄԻԵԴ-ն իր որոշմամբ ապացուցել է ադրբեջական իշխանությունների թելադրմամբ դատական համակարգի մասնակցությունը Իսմաիլովայի դեմ արշավին և ընդհանրապես երկրում խոսքի իրավունքի խախտումներին։ «Բացի այն, որ Խադիջա Իսմաիլովան երկար պատժաչափ է կրել՝ կեղծ մեղադրանքների հիման վրա, նա նաև երկար տարիներ իշխանությունների կողմից հետապնդումների է ենթարկվել, ինչպես նաև՝ խախտվել է նրա անձնական կյանքի գաղտնիությունը, իսկ իշխանամետ մամուլում նրա դեմ արշավ է իրականացվել», – նշել է Նոզաձեն։
«Amnesty International»-ի ներկայացուցիչը կոչ է արել Ադրբեջանի իշխանություններին՝ ամբողջության կատարել ՄԻԵԴ-ի վճիռը․ այն է՝ Իսմաիլովային վճարել սահմանված փոխհատուցումը, պատասխանատվության ենթարկել մարդու իրավունքների խախտման մեջ բոլոր մեղավորներին, ինչպես նաև՝ դադարեցնել դատական համակարգում իշխանության չարաշահումները։
Նշենք, որ սա ՄԻԵԴ-ի երրորդ վճիռն է՝ ի օգուտ Խադիջա Իսմաիլովայի։ 2020թ․ փետրվարին ՄԻԵԴ-ը սահմանել էր, որ Իսմաիլովան 2015թ․ դատապարտվել է 7․5 տարվա ազատազրկման (այդ պատիժն ավելի ուշ կրճատվել էր՝ հասցվելով 3 տարվա)՝ նրան լռեցնելու և լրագրողական գործություն կատարելու համար պատժելու նպատակով։ Իսկ 2019թ․ հունվարին կայացված ՄԻԵԴ-ի վճռով Ադրբեջանի իշխանությունները մեղավոր էին ճանաչվել Իսմաիլովայի անձնական կյանքի անձեռնամխելիությունը և խոսքի ազատության իրավունքը խախտելու մեջ։
Հետևեք մեզ տելեգրամում
