ԱՄՆ նախագահ Դոնալդ Թրամփը հայտարարել է, որ իր հատուկ բանագնաց Սթիվ Ուիթքոֆը և իր փեսա, նախկին գլխավոր խորհրդական Ջարեդ Քուշները Մոսկվայում Ռուսաստանի նախագահ Վլադիմիր Պուտինի հետ ունեցել են «բավական լավ» հանդիպում։ Հայտնում է ABC News-ը:
Թրամփի խոսքով՝ ամերիկացի բանակցողները զգացել են, որ Պուտինը «կցանկանար ավարտել պատերազմը»։«Չգիտեմ՝ Կրեմլում ինչ են անում։ Կարող եմ միայն ասել, որ նրանք բավականին լավ հանդիպում են ունեցել նախագահ Պուտինի հետ։ Կտեսնենք՝ ինչ արդյունք կտա դա։ Դա մի պատերազմ է, որը երբեք չպետք է սկսվեր»,- լրագրողների հետ զրույցում ասել է Թրամփը։
Թրամփը նշել է, որ հանդիպումից հետո խոսել է Ուիթքոֆի և Քուշների հետ։ «Ի՞նչ դուրս կգա այդ հանդիպումից՝ չեմ կարող ասել, որովհետև տանգոյի համար երկու կողմ է հարկավոր»,-ընդգծել է նա։ Պուտինի մասին խոսելիս Թրամփը հավելել է․ «Նրանք տպավորություն էին ստացել, որ նա ցանկանում է վերջ տալ պատերազմին»։
Ըստ Թրամփի՝ Պուտինը հավանաբար ցանկանում է «վերադառնալ ավելի նորմալ կյանքին»։ «Կարծում եմ՝ նա կուզենար կրկին առևտուր անել Միացյալ Նահանգների հետ՝ շաբաթական հազարավոր զինվորներ կորցնելու փոխարեն։ Նրանց տպավորությունն այն էր, որ նա ցանկանում է պայմանավորվածության գալ»,-ասել է Թրամփը։
Հիշեցնենք, որ դեկտեմբերի 3-ին ՌԴ նախագահ Վլադիմիր Պուտինը ռուս-ուկրաինական հակամարտության դադարեցման շուրջ Կրեմլում հանդիպում էր անցկացրել ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆի և նախագահի նախկին խորհրդական ու փեսա Ջարեդ Քուշների հետ: Հանդիպումը տևել էր շուրջ հինգ ժամ և ավարտվել առանց հստակ պայմանավորվածությունների:
Հետևեք մեզ տելեգրամում
