Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոն ոգևորված է Ադրբեջան-Հայաստան խաղաղության գործընթացի վերջին դրական քայլերի շարքով, մասնավորապես Ադրբեջանի՝ դեպի Հայաստան ապրանքների տարանցման սահմանափակումների վերացման մասին հայտարարությամբ: Այս մասին Գրոնոն գրառում է կատարել X սոցիալական ցանցում:
Նա նաև անդրադարձել է Ժնևում Հայաստանի և Ադրբեջանի խորհրդարանների խոսնակներ Ալեն Սիմոնյանի ու Սահիբա Գաֆարովայի հանդիպմանը, Երևանում երկու երկրների քաղաքացիական հասարակության փորձագետների կլոր սեղանի քննարկումներին:
Գրոնոն նշել է, որ Եվրամիությունը ջերմորեն ողջունում է այս գործնական զարգացումները և պատրաստ է աջակցել բոլոր նմանատիպ նախաձեռնություններին և վստահության ամրապնդման լրացուցիչ միջոցառումներին:
«Մենք նաև ողջունում ենք Գյումրի-Կարս երկաթուղու վերականգնման և վերագործարկման վերաբերյալ Հայաստան-Թուրքիա մեկ այլ հանդիպման նախապատրաստական աշխատանքների մասին արված հայտարարությունը»,-եզրափակել է ԵՄ հատուկ ներկայացուցիչը:
Հետևեք մեզ տելեգրամում
