Վրաստանը հունիսի 15-ից կարտոնի ներքին զբոսաշրջությունը, իսկ հուլիսի 1-ից կբացվեն սահմանները նաև արտերկրից ժամանող զբոսաշրջիկների համար։
Այս մասին հայտնել է Վրաստանի վարչապետ Գեորգի Գախարիան։ Նա նշել է, որ զբոսաշրջության խթանման նպատակով հարևան երկրների հետ ցամաքային սահմաններին հատուկ անվտանգության միջանցքներ կստեղծվեն, ինչպես նաև՝ նույն նպատակով բանակցություններ կտարվեն զբոսաշրջության տեսակետից Վրաստանի համար հետաքրքրություն ներկայացնող երկրների հետ։
Գախարիան տեղեկացրել է նաև վրացական քաղաքների աստիճանական բացման վերաբերյալ։ Մայիսի 11-ից Թիֆլիսում կչեղարկվեն մուտքի և ելքի բոլոր սահմանափակումները, սակայն պարեկային ժամը կպահպանվի։ Նույն օրը կվերսկսվեն համավարակի պատճառով դադարեցված արդյունաբերական բոլոր տեսակի գործունեությունները։ Կվերաբացվեն նաև փողոցից առանձին մուտք ունեցող բոլոր խանութները՝ բացառությամբ առևտրի կենտրոնների և հագուստի խանութների։
Հիշեցնենք, որ կորոնավիրուսի համավարակի պատճառով Վրաստանի իշխանությունները մարտի 21-ից արտակարգ դրություն են հայտարարել։ Բացի այդ՝ գործում է պարեկային ռեժիմ․ արգելվում է տանից դուրս գալ երեկոյան 21-ից մինչև առավոտյան 6-ը։ Որոշ քաղաքներում տեղաշարժի սահմանափակումներ են գործում։
Մայիսի 7-ի տվյալների համաձայն՝ Վրաստանում հաստատվել է կորոնավիրուսի 615 դեպք, նրանցից 275-ը առողջացել են, 9-ը՝ մահացել։
Հետևեք մեզ տելեգրամում
