Վրաստանի խորհրդարանի նախագահ Շալվա Պապուաշվիլին Թբիլիսիում ներկա է գտնվել Թուրքիայի Անկախության օրվա առթիվ կազմակերպված միջոցառմանը, որի ընթացքում նշել է, որ Թուրքիան Վրաստանի ռազմավարական դաշնակիցն է, ամենամեծ առևտրային գործընկերն ու վստահելի հարևանը։
Նա հավելել է, որ Վրաստանը բարձր է գնահատում Թուրքիայի անսասան աջակցությունը Վրաստանի ինքնիշխանությանն ու տարածքային ամբողջականությանը, ինչպես նաև նրա մասնակցությունը Սև ծովի և Հարավային Կովկասի տարածաշրջանում խաղաղության և կայունության ապահովման գործում։
«Ուրախ եմ, որ այսօր տարածաշրջանին լավատեսությամբ ենք նայում։ Տեսնում ենք դրական շարժ Հարավային Կովկասում՝ երկարաժամկետ խաղաղության հաստատման ուղղությամբ, այդ թվում՝ Հայաստանի և Ադրբեջանի միջև խաղաղության պայմանագրի հնարավորության և տարանցման սահմանափակումների վերացման հարցերում։ Մենք նաև ողջունում ենք Թուրքիայի և Հայաստանի միջև հարաբերությունների կարգավորման գործընթացում կատարված դրական քայլերը։ Վրաստանը վճռականորեն աջակցում է այս գործընթացին, որովհետև հավատում ենք, որ կայուն և խաղաղ Հարավային Կովկասը կբերի նոր հնարավորություններ՝ տնտեսական աճի, առևտրի և ժողովուրդների միջև կապերի համար»,-նշել է Պապուաշվիլին։
Հետևեք մեզ տելեգրամում
