Հոկտեմբերի 30-ին Վաշինգտոնում տեղի է ունեցել ՀՀ անկախության 34-ամյակի առթիվ կազմակերպված հանդիսավոր ընդունելություն, որին մասնակցել են ԱՄՆ տարբեր գերատեսչությունների բարձրաստիճան ներկայացուցիչներ, այդ երկրում հավատարմագրված դիվանագետներ, դիվանագիտական ու ռազմական շրջանակների ներկայացուցիչներ, ամերիկյան գործարար ոլորտի անդամներ, ինչպես նաևՀՀ պատվո հյուպատոսներ և հայ համայնքի ներկայացուցիչներ։
Միջոցառման ընթացքում ելույթ է ունեցել նաև ԱՄՆ Պետքարտուղարության քաղաքականության մշակման հարցերով աշխատակազմի ներկայացուցիչ Ջոնաթան Ասքոնասը։ Նա ևս շնորհավորել է ներկաներին անկախության տարեդարձի առթիվ և վերահաստատել է ԱՄՆ վճռականությունը՝ ընդլայնելու երկկողմ համագործակցությունը, հայտնում է ԱՄՆ–ում ՀՀ դեսպանությունը։ Դեսպան Նարեկ Մկրտչյանը շնորհավորել է ներկաներին ՀՀ անկախության տարեդարձի առթիվ՝ ընդգծելով անկախության պատմական արժեքը։ Դեսպանը ներկայացրել է 1991թ. անկախության հանրաքվեի քվեաթերթիկի բնօրինակը՝ որպես ժողովրդի՝ անկախ պետություն ունենալու միասնական կամքի խորհրդանիշ։
Մկրտչյանը, անդրադառնալով տարածաշրջանում տեղի ունեցած վերջին իրադարձություններին, նշել է օգոստոսի 8-ին Սպիտակ տանը նախագահ Դոնալդ Թրամփի միջնորդությամբ ստորագրված խաղաղության պայմանագրի պատմական կարևորությունը։ Նա իր երախտագիտությունն է հայտնել ԱՄՆ վարչակազմի գործընկերներին՝ Հայաստանի նկատմամբ ցուցաբերված կայուն աջակցման համար՝ ընդգծելով երկու երկրների միջև խաղաղության, ժողովրդավարության և փոխադարձ հարգանքի հիման վրա ձևավորված կապերի խորացման անհրաժեշտությունը։
Հետևեք մեզ տելեգրամում
