ՀՀ արտգործնախարար Արարատ Միրզոյանը Օրբելի կենտրոնի «Կառուցելով խաղաղություն և բազմակողմանի համագործակցություն» համաժողովի ընթացքում, խոսելով հայ-իրանական հարաբերությունների մասին, դրանք անվանել է ռազմավարական։
«Մենք Իրանի հետ երկուստեք պատրաստակամություն ենք հայտնել թղթով արձանագրել գործընկերության ռազմավարական բնույթը՝ միևնույն ժամանակ ասելով, որ այսօր էլ մեր և Իրանի հարաբերությունները հենց ռազմավարական կարևորություն ունեն և ռազմավարական են։ Այստեղ ավելի շատ ոչ թե հարաբերությունները նոր մակարդակի բարձրացնելու, այլ եղածը արձանագրելու և ստորագրելու անհրաժեշտություն կա,- ընդգծել է նա։
Անդրադառնալով Իրանի նկատմամբ պատժամիջոցների պայմաններում Թեհրանի հետ համագործակցությանը՝ նախարարը նշել է․ «Մեր հազարամյակների բարեկամ և հարևան Իրանի հետ հարաբերությունները մեզ համար շատ-շատ կարևոր են։ Աշխարհում ոչինչ չի կարող խաթարել այս բարեկամությունը և գործընկերությունը։ Դա կլինի քայլ Հայաստանի Հանրապետության դեմ։ Ես չեմ պատկերացնում ՀՀ որևէ կառավարություն, որը չի շարունակի Իրանի հետ հարաբերություններն այդ նույն եղբայրության մթնոլորտում։ Սրան զուգահեռ կան միջազգային պատժամիջոցներ, որոնք մենք չենք շրջանցելու և չենք շրջանցել երբեք։ Մենք ազնիվ և թափանցիկ ենք մեր բոլոր միջազգային գործընկերների հետ, այդ թվում՝ Իրանի։ Ցավով արձանագրում ենք, որ այդ պատժամիջոցները սահմանափակում են Իրանի հետ տնտեսական հարաբերությունները։ Այդ սահմանափակումներից անդին, մենք շատ աշխույժ տնտեսական հարաբերություններ ունենք Իրանի հետ, և այդպես էլ շարունակվելու է։ Ես, որպես ՀՀ արտգործնախարար կարող եմ հուսալ միայն, որ այդ սահմանափակումները կվերանան, և մենք կկարողանանք մեր հարաբերությունների ամբողջական պոտենցիալը օգտագործել »,- շեշտել է նա։
Հետևեք մեզ տելեգրամում
