Հայաստանի և Իրանի հարաբերություններում առկա մթնոլորտը շատ դրական է: «Օրբելի» կենտրոնի կողմից կազմակերպված երկօրյա համաժողովի շրջանակներում Region Monitor-ին տված հարցազրույցում այդպիսի կարծիք է հայտնել Տարածաշրջանային հետազոտությունների իրանական ասոցիացիայի նախագահ, Թեհրանի համալսարանի իրավունքի և քաղաքական գիտությունների ֆակուլտետի դոցենտ Բահարեհ Սազմանդը:
«Հայաստանի և Իրանի հարաբերությունները շատ լավ մակարդակում են: Մենք ունենք պատմական, մշակութային մի շարք ընդհանրություններ, ինչպես նաև ընդհանուր մտահոգություններ: Կան նաև խնդիրներ, ինչպես օրինակ՝ պատժամիջոցները, սակայն դրանք չեն ազդել հարաբերությունների դրական ընթացքի վրա»,- ընդգծել է նա:
Սազմանդը, անդրադառնալով ԵԱՏՄ-ի և Շանհայի համագործակցության կազմակերպության (ՇՀԿ) շրջանակներում Հայաստանի ու Իրանի փոխգործակցության հեռանկարներին, նշել է. «Հայաստանը ԵԱՏՄ-ի միջոցով, իսկ Իրանն էլ Շանհայի համագործակցության կազմակերպության միջոցով կարող են հետամուտ լինել միջտարածաշրջանային համագործակցության զարգացմանը, որը կլրացնի գոյություն ունեցող նախաձեռնությունները»:
Սազմանդը համոզմունք է հայտնել, որ Հայաստանի միջոցով Իրանը կարող է հասանելիություն ունենալ ԵԱՏՄ անդամ երկրների շուկաներին: «Մյուս կողմից Իրանն էլ ՇՀԿ անդամ է, որտեղ քննարկվում են նաև անվտանգության, վստահության կառուցման հարցեր: Քանի որ Հայաստանն էլ այս կառույցին անդամակցելու ցանկություն ունի, Իրանն էլ այդ հարցում կարող է օգնել»,-նշել է նա:
Սազմանդը կարևորել է հանրային դիվանագիտության խթանումը՝ նկատելով, որ Հայաստանն այս ուղղությամբ շատ ակտիվ է: Նրա դիտարկմամբ՝ Հայաստանն ու Իրանը պետք է ուշադրություն դարձնեն գիտակթական ոլորտում համագործակցության զարգացմանը, այդ թվում՝ երկու երկրներում համապատասխանաբար հայերենի և պարսկերենի ուսուցման խթանմանը, հետազոտական կենտրոնների միջև կապերի ամրապնդմանը: Սազմանդի խոսքով՝ կարելի է դիտարկել նաև տարածաշրջանային ուսումնասիրությունների համատեղ կենտրոն ստեղծելու հարցը:
Հանրային դիվանագիտության ակտիվացման շրջանակներում նա նաև դրական է գնահատել «Օրբելի ֆորումի» դերը: «Այն հնարավորություն է ստեղծել և՛ փորձագիտական շփումների, և՛ անմիջապես ՀՀ պաշտոնյաների կողմից ՀՀ արտաքին քաղաքական զարգացումներին ծանոթանալու համար»,-նշել է նա:
Հետևեք մեզ տելեգրամում
