Սպառազինության աղբյուրների դիվերսիֆիկացումը և ռազմատեխնիկական կապերի զարգացումն առանցքային դեր ունեն Հայաստանի ազգային անվտանգության ճարտարապետության մեջ։ Արմենպրեսի փոխանցմամբ՝ այդ մասին հայտարարել է պաշտպանության նախարար Սուրեն Պապիկյանն Ազգային ժողովում՝ 2026 թվականի պետական բյուջեի նախագծի քննարկման ժամանակ։
«Հենց այս տրամաբանությամբ էլ շարունակում ենք Զինված ուժերի սպառազինության արդիականացմանն ուղղված աշխատանքները, համագործակցությունը նոր գործընկերների հետ»,- ասել է Պապիկյանը։
Նրա խոսքով, ՀՀ պաշտպանության նախարարությունը շարունակաբար խթանել է նաև տեղական ռազմարդյունաբերության զարգացումը՝ բյուջետային նշանակալի աճի շնորհիվ։
«2022 թվականին մենք տեղական ռազմարդյունաբերական ընկերությունների հետ ունեցել ենք մոտավորապես 5.5 միլիարդ դրամի պայմանագրեր։ Այդ թիվն այսօր դարձել է 171 միլիարդ դրամ»,- մանրամասնել է Սուրեն Պապիկյանը։
Նախարարը նաև ընդգծել է, որ Հայաստանի Հանրապետությունը Զինված ուժերն ու սպառազինությունն օգտագործելու է բացառապես երկրի տարածքային ամբողջականության և ինքնիշխանության պաշտպանության նպատակով։
։
Հետևեք մեզ տելեգրամում
