Վրաստանի խորհրդարանի խոսնակ Շալվա Պապուաշվիլին անդրադարձել է ՆԱՏՕ-ի գլխավոր քարտուղարի՝ Վրաստանի մասին արված հայտարարությանը՝ նշելով, որ Դաշինքին անդամակցության հարցն ամրագրված է երկրի Սահմանադրությամբ։
«Վրաց ժողովուրդն այլևս միամիտ չէ նման հայտարարությունների նկատմամբ. նրանք հստակ տեսնում են, թե ինչի հետ գործ ունենք։ 2008թ․ նրանք ասացին, որ դուռը բաց է, և այդ ժամանակվանից անցել է 17 տարի։ Վրաստանն արել է հնարավոր ամեն ինչ՝ թե՛ ինստիտուցիոնալ, թե՛ ռազմական մերձեցման առումով, մասնակցելով պատերազմներին և մարտական գործողություններին ՆԱՏՕ-ի զորքերի հետ կողք կողքի։ Երբ պարոն Ռյուտեն վարչապետ էր, մենք Աֆղանստանում տասն անգամ ավելի մեծ զորախումբ ունեինք։ Հետևաբար, ժամանակն է դադարեցնել մատով ցույց տալը և հարցեր տալը։ Վրաց ժողովուրդը այլևս այնքան միամիտ չէ, որ հանդուրժի դա։ Գնդակն ամբողջությամբ ՆԱՏՕ-ի դաշտում է։ Վրաստանն ամեն ինչ արել է ՆԱՏՕ-ի անդամ դառնալու համար. ավելին, դա ամրագրված է մեր Սահմանադրությամբ»,- հայտարարել է Պապուաշվիլին։
Վրաստանի խորհրդարանի խոսնակը հիշատակել է նաև Ուկրաինայի նախագահի խոսքերը, երբ 2022-ին հարցրել էր արդյոք ընդունում են նրանց ՆԱՏՕ, թե՝ ոչ։ Ըստ Պապուաշվիլիի՝ Ուկրաինան մինչ օրս չի ստացել ո՛չ «այո», ո՛չ էլ՝ «ոչ»։
Նշենք, որ ՆԱՏՕ-ի գլխավոր քարտուղար Մարկ Ռյուտեն Ազատություն ռադիոկայանի հետ զրույցում անդրադարձել է Վրաստանին՝ նշելով, որ Դաշինքը համագործակցում է Վրաստանի հետ, և, ի թիվս այլ հարցերի, մտահոգություն է հայտնում ստեղծված իրավիճակի վերաբերյալ։
Հետևեք մեզ տելեգրամում
