Թուրքիայի արտգործնախարար Հաքան Ֆիդանը Թեհրանում հանդիպել է Իրանի արտգործնախարար Աբբաս Արաղչիի հետ։ Հանդիպման ընթացքում կողմերը քննարկել են երկու երկրների հարաբերությունների զարգացումը, տարածաշրջանային իրավիճակը և կարևոր միջազգային հարցեր։ Հանդիպումից հետո երկու երկրների արտգործնախարարները հանդես են եկել համատեղ մամուլի ասուլիսով։
Արաղչին նշել են, որ Իրանն ու Թուրքիան միայն հարևաններ չեն, այլ բարեկամ և եղբայր երկրներ՝ բազմաթիվ ընդհանուր հետաքրքրություններով։ Արաղչին շեշտել է, որ երկու երկրների սահմանները խաղաղության և բարեկամության սահմաններ են։ Նա նշել է, որ երկու երկրների առևտուրը աճում է, սակայն դեռևս չեն հասել նախատեսված նպատակային ցուցանիշներին։ Նա հավելել է, որ Իրանը պատրաստ է Վան քաղաքում բացել գլխավոր հյուպատոսություն։
Իրանի ԱԳ նախարարն ընդգծել է Թեհրանի պատրաստակամությունը երկարաձգելու Թուրքիայի հետ գազի պայմանագիրը և ընդլայնելու էներգետիկ համագործակցությունը՝ կարևորելով Իրանի և Թուրքիայի երկաթուղային կապերի միացումը՝ հույս հայտնելով, որ շինարարական աշխատանքները կսկսվեն շուտափույթ։ Արաղչին նաև հայտնել է, որ Իրանը Կովկասում աջակցում է կայունությանը՝ տարածաշրջանի երկրների մասնակցությամբ և դեմ է արտատարածաշրջանային միջամտություններին։
Ֆիդանը նշել է, որ քննարկվել է գազի ու էլեկտրաէներգիայի ոլորտում համագործակցության ընդլայնումը։ Նրա խոսքով՝ մոտ ապագայում Թեհրանում նախատեսվում է անցկացնել Թուրքիայի և Իրանի բարձր մակարդակի համագործակցության խորհրդի նիստը՝ երկու երկրների նախագահների մասնակցությամբ։ Ֆիդանը նշել է, որ Արաղչիի հետ քննարկել են Ռուսաստանի և Ուկրաինայի շուրջ ստեղծված իրավիճակը։ Նա հաղորդել է, որ Թուրքիան շփման մեջ է այս հարցում ներգրավված տարբեր կողմերի հետ և աջակցում է այն նախաձեռնություններին, որոնք կարող են բերել խաղաղության։
Հետևեք մեզ տելեգրամում
