Իրանում ՀՀ դեսպան Գրիգոր Հակոբյանը հանդիպել է ԻԻՀ Մեջլիսի նախագահի՝ միջազգային հարցերով հատուկ օգնական Աբոլֆազլ Ամույիի հետ։ Այս մասին հայտնում է ՀՀ դեսպանությունը:
Զրուցակիցները քննարկել են երկու երկրների խորհրդարանների միջև համագործակցության խորացման և շփումների ակտիվացման հարցերը։ Այդ համատեքստում կարևորվել են խորհրդարանական բարձրաստիճան պատվիրակությունների առաջիկա փոխայցելությունները։ Հանդիպման ընթացքում անդրադարձ է կատարվել նաև տարածաշրջանային հարցերին։
Ըստ իրանական կողմի տարածած հաղորդագրության՝ Ամուին Իրանի աջակցությունն է հայտնել Հարավային Կովկասում կայուն խաղաղության հաստատմանը: Անդրադառնալով Թեհրանի մտահոգություններին՝ նա նշել է. «Չպետք է թույլ տանք, որ Հայաստանի և Իրանի միջև պատմական վստահությունը և բարեկամությունը վնասվեն երրորդ ուժերի կողմից»։
ՀՀ դեսպանը շնորհակալություն է հայտնել ԻԻՀ դիրքորոշման համար և ընդգծել, որ Իրանը ՀՀ վաղնջական բարեկամն ու բնական դաշնակիցն է: «Հայաստանը չի աջակցելու որևէ գործողության, որը վնաս կհասցնի Իրանին, քանի որ ցանկացած վնաս Իրանին ուղիղ հետևանքներ է ունենալու Հայաստանի վրա»,-նշել է Հակոբյանը:
Հետևեք մեզ տելեգրամում
