ՌԴ նախագահ Վլադիմիր Պուտինը ռուս-ուկրաինական հակամարտության դադարեցման շուրջ Կրեմլում հանդիպում է անցկացրել ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆի և նախագահի նախկին խորհրդական ու փեսա Ջարեդ Քուշների հետ: Հանդիպումը տևել է շուրջ հինգ ժամ, սակայն կողմերին չի հաջողվել հասնել փոխհամաձայնության։ Հայտնում է Armenpress-ը:
Բանակցություններին ռուսական կողմից ներկա են եղել ՌԴ նախագահի օգնական Յուրի Ուշակովը և ՌԴ նախագահի արտասահմանյան երկրների հետ ներդրումային-տնտեսական համագործակցության հարցերով հատուկ ներկայացուցիչ Կիրիլ Դմիտրիևը։ Հանդիպումից հետո Դմիտրիևը X-ում գրել է ընդամենը մեկ բառ՝ «արդյունավետ», իսկ Ուշակովը հայտնել է, որ տարածքային հարցերը ՌԴ-ի համար չափազանց կարևոր են, սակայն դրանց շուրջ փոխզիջման տարբերակ այս փուլում գտնել չի հաջողվել։
Ուշակովի խոսքով՝ ամերիկյան փաստաթուղթը բաղկացած է եղել 27 կետից, և ծանոթանալու համար այն փոխանցվել է ռուսական կողմին։ Բացի դրանից, Մոսկվային են հանձնվել ևս չորս փաստաթուղթ, որոնք նույնպես քննարկվել են Կրեմլում կայացած բանակցությունների ընթացքում։
Լրագողներն Ուշակովին հարցրել են՝ արդյոք հանդիպումից հետո կողմերն ավելի են հեռացել միմյանցից հակամարտության լուծման հարցում։ «Միանշանակ՝ ոչ։ Բայց դեռ շատ աշխատանք է պահանջվում թե՛ Վաշինգտոնում, թե՛ Մոսկվայում։ Պայմանավորվածություն է ձեռք բերվել շարունակել շփումները»,- նշել է նա։
Նա նշել է, որ քննարկվել են ոչ թե ամերիկյան կոնկրետ առաջարկները, կոնկրետ ձևակերպումները, այլ ամերիկյան փաստաթղթերում տեղ գտած դրույթների էությունը։ «Ինչ-որ բանի հետ մենք կարող ենք համաձայնել, և նախագահը դա հաստատել է իր զրուցակիցներին։ Ինչ-որ բան մեզ մոտ քննադատություն է առաջացրել, և նախագահը չի թաքցրել մեր քննադատական, նույնիսկ բացասական վերաբերմունքը մի շարք առաջարկներին։ Բայց կարևորն այն է, որ կայացել է բավականին օգտակար քննարկում»,-հավելել է ՌԴ նախագահի օգնականը:
Ինչ վերաբերում է Վլադիմիր Պուտինի և Դոնալդ Թրամփի հնարավոր հանդիպմանը, Ուշակովը նշել է, որ դա կախված կլինի նրանց օգնականների և արտաքին գերատեսչությունների աշխատանքից։ Նա նաև ընդգծել է, որ կողմերը պայմանավորվել են չբացահայտել բանակցությունների մանրամասները։
Հետևեք մեզ տելեգրամում
