Իսրայելի վարչապետ Բենիամին Նեթանյահուն հայտարարել է, որ հնարավոր է համարում Սիրիայի հետ անվտանգության համաձայնագրի կնքումը, եթե Դամասկոսից հարավ ընկած տարածքներն ապառազմականացվեն։ Այս մասին հաղորդում է Armenpress-ը:
«Մենք ակնկալում ենք, որ Սիրիան ստեղծի ապառազմականացված անվտանգության գոտի՝ Դամասկոսից մինչև բուֆերային գոտի, ներառյալ Հերմոն լեռը և նրա գագաթի շրջակայքը։ Մենք վերահսկում ենք այս տարածքները Իսրայելի քաղաքացիների անվտանգությունը ապահովելու նպատակով, և հենց սա է մեր պարտավորությունը։ Բարի կամքի և այս սկզբունքների գիտակցման պայմաններում հնարավոր է ընդհանուր լեզու գտնել նաև սիրիացիների հետ, սակայն մենք միանշանակ կպահպանենք մեր դիրքորոշումը»,– նշել է Նեթանյահուն։
Սիրիայում իշխանափոխությունից հետո իսրայելական բանակը վերահսկողություն է հաստատել երկրի հարավում գտնվող Գոլանի բարձունքների անվտանգության բուֆերային գոտու նկատմամբ և իրականացրել մի շարք ռազմաօդային գործողություններ։ Իսրայելի իշխանությունները այդ քայլերը բացատրում են Գոլանի բարձունքների հարևանությամբ գտնվող իրենց հյուսիսային քաղաքների ու բնակավայրերի անվտանգության ապահովմամբ, ինչպես նաև Դամասկոսի նոր իշխանությունների ձեռքում մեծ քանակությամբ զինատեսակների ու ռազմական տեխնիկայի հայտնվելը կանխելու անհրաժեշտությամբ։
Իսրայելը և Սիրիան մի քանի ամիս շարունակ բանակցել են անվտանգության համաձայնագրի շուրջ, սակայն առայժմ զգալի առաջընթաց չի գրանցվել։
Հետևեք մեզ տելեգրամում
