Վերջին օրերին հայկական լրատվամիջոցներում ակտիվորեն տարածվում են պնդումներ, թե Վրաստան մուտք գործող զբոսաշրջիկները 2026 թվականի հունվարի 1-ից պարտավոր են ունենալ բժշկական և դժբախտ պատահարների ապահովագրություն, իսկ ապահովագրություն չունենալու համար նախատեսված են տուգանքներ։
Սակայն վրացական օրենսդրության և պաշտոնական աղբյուրների ուսումնասիրությունը ցույց է տալիս, որ այս տեղեկությունների զգալի մասը չի համապատասխանում իրականությանը կամ ներկայացվում է թերի։
Թեմայի վերաբերյալ «Region Monitor»-ը զրուցել է Վրաստանի հարցերով փորձագետ Էդվարդ Բերուջանյանի հետ։
Փորձագետը նշեց, որ Վրաստանի «Տուրիզմի մասին» օրենքի 12-րդ հոդվածը իսկապես նախատեսում է առողջության և դժբախտ պատահարների պարտադիր ապահովագրություն այն զբոսաշրջիկների համար, որոնք մուտք են գործում երկիր։ Սկզբնական դրույթով այս պահանջը նախատեսված էր ուժի մեջ մտնել 2024 թվականի հունիսի 1-ին, սակայն դրա գործարկումը հետաձգվեց մինչև 2026 թվականի հունվարի 1-ը՝ պաշտոնական բացատրությամբ, որ մասնավոր հատվածը դեռ պատրաստ չէր նոր համակարգին։
Այդ պատճառով սահմանվեց լրացուցիչ ժամանակ՝ ապահովագրության համակարգը կանոնակարգելու, ոլորտին հարմարեցնելու և սահմանային մարմիններին համապատասխան հստակ մեխանիզմներ տրամադրելու համար։
Սակայն, չնայած օրենքի առկայությանը՝ պարտադիր ապահովագրության գործարկումը դեռևս հնարավոր չէ, քանի որ չկա կառավարության կողմից ընդունված ամենակարևոր իրավական ակտը՝ «Վրաստան մուտք գործող զբոսաշրջիկների առողջության և դժբախտ պատահարների պարտադիր ապահովագրության կանոնների և պայմանների հաստատման մասին» որոշումը։
Բերուջանյանը նշեց, որ այս փաստաթուղթը պետք է սահմաներ՝ ինչ տեսակի ապահովագրությունն է համարվում բավարար, ինչ պահանջներ պետք է ներառի ապահովագրական փաթեթը, ինչպես է իրականացվելու ստուգումը սահմանին, և արդյոք նախատեսվելու են տուգանքներ կամ այլ պատասխանատվություն։
Սակայն այս որոշումը այս փուլում չի ընդունվել և չի հրապարակվել ոչ կառավարության կայքում, ոչ իրավական ռեեստրում, ոչ էլ որևէ պաշտոնական հարթակում։
Ընդ որում Վրաստանի Զբոսաշրջության ազգային վարչությունը 2025 թվականի դեկտեմբերի 2-ին «Batumelebi» լրատվականի հարցմանն ի պատասխան հայտնել է, որ վերոնշյալ որոշման ուժի մեջ մտնելու նախատեսված օրը 2026 թվականի հունվարի 1-ն է, սակայն մանրամասները կհրապարակվեն ավելի ուշ։ Այլ հարցերին այս պահին պաշտոնական մեկնաբանություն չի տրվել։
«Այս պայմաններում տուգանքների մասին շրջանառվող տեղեկությունները՝ մասնավորապես «300 լարի» չափի տուգանքները, չունեն ոչ մի պաշտոնական հիմք։ Դրանք չեն ամրագրված ոչ օրենսդրության մեջ, ոչ կառավարական փաստաթղթերում։ Ավելին, վրացական լրատվական դաշտում նման թվի մասին որևէ նշում չկա։ Սա վկայում է, որ շրջանառվող թվերը ձևավորվել են որպես մեդիա ենթադրություններ կամ սխալ մեկնաբանված տեղեկատվության արդյունք։Այլ կերպ ասած, այս պահին Վրաստանում պարտադիր ապահովագրություն ունենալու պահանջն իրավական ուժ չունի, քանի որ դրա գործարկման համար անհրաժեշտ կառավարության հիմնական որոշումը դեռ չի ընդունվել։ Առանց այդ փաստաթղթի հնարավոր չէ ոչ սահմանային ստուգում իրականացնել, ոչ էլ սահմանել որևէ պատասխանատվություն կամ տուգանք։ Ուստի, մինչև կարգավորող փաստաթուղթը չհրապարակվի և չսկսի գործել, Վրաստան մուտք գործող զբոսաշրջիկները պարտադիր ապահովագրություն ունենալու պարտականություն չունեն, և սահմանային մարմինները նման պահանջ ներկայացնել չեն կարող։ Կարևոր է նաև նշել, որ պարտադիր ապահովագրության պահանջը կսկսի գործել միայն այն դեպքում, եթե Վրաստանի կառավարությունը մինչև 2026 թվականի հունվարի 1-ը հաստատի համապատասխան որոշումը»,-նշեց փորձագետը։
Հետևեք մեզ տելեգրամում
