Թուրքիայի նախագահի աշխատակազմի հանրային կապերի վարչությունը հայտնում է, որ Թուրքմենստանի մայրաքաղաք Աշխաբադում անցկացվող «Խաղաղության և անվտանգության միջազգային ֆորումի» շրջանակում հանդիպել են Թուրքիայի նախագահ Ռեջեփ Թայիփ Էրդողանը և ՌԴ նախագահ Պուտինը։ Հանդիպման վերաբերյալ այլ մանրամասներ չեն հաղորդվել։
Կրեմլի տարածած հաղորդագրության համաձայն՝ կողմերը քննարկել են բազմաթիվ խոշոր համատեղ նախագծերի, հիմնականում՝ Աքքույուի ատոմակայանի շինարարության շարունակականության իրականացումը, երկկողմ հարաբերությունների ընթացքը։ Տեղի է ունեցել նաև մտքերի մանրամասն փոխանակում ուկրաինական, տարածաշրջանային և միջազգային հարցերի շուրջ: Վլադիմիր Պուտինը և Ռեջեփ Թայիփ Էրդողանը քննարկել են ռուսական ակտիվները բռնագրավելու եվրոպական փորձերը:
Ըստ Կրեմլի՝ կողմերը համաձայնել են, որ եվրոպացիների կողմից նման չմտածված գործողությունները, ըստ էության, կհանգեցնեն Բրետոն Վուդսի համակարգի և միջազգային ֆինանսական համակարգի սկզբունքների փլուզմանը։
Հետևեք մեզ տելեգրամում
